Жаҳон бокси рекордчиси ўз уйи олдида шафқатсиз ўлдирилди

Икки вазн тоифасида собиқ жаҳон чемпиони ҳисобланган Золани Тете (29-4-1, 22 КО) 38 ёшида Жанубий Африкада отиб ўлдирилди, деб хабар бермоқда Boxingscene манбаси.

Ҳодиса жума куни кечқурун Шарқий Кап провинциясидаги Мдантане шаҳарчасида содир бўлган. Дастлабки маълумотларга кўра, Тете автомашинасида уйи олдига келиб, дарвоза очилишини кутган пайтда ҳужумга учраган. Шу вақтда юзи ниқобланган, қуролланган икки киши машинага яқинлашиб, ўқ узган.

Боксчи машинаси билан ҳовлига кириб улгурган, аммо оғир яраланиб, воқеа жойида ҳалок бўлган. У билан бирга бўлган 27 ёшли аёл ҳам ўқотар қуролдан жароҳат олиб, жуда оғир аҳволда шифохонага етказилган. Ҳужумчилар воқеа жойидан қочиб кетишган, полиция қотиллик юзасидан тергов олиб бормоқда.

«Last Born» лақаби билан танилган Золани Тете иккинчи енгил вазн тоифасида IBF, енгил вазнда эса WBO версиялари бўйича жаҳон чемпиони бўлган. 2017 йилда у бокс тарихига кирган: ҳамюрти Сибонисо Гонюни атиги 11 сонияда нокаутга учратган. Бу натижа жаҳон чемпионлик жанглари орасида энг тез нокаут бўйича рекорд сифатида қайд этилган.

Тетенинг охирги жангини 2022 йил июлида британиялик Жейсон Каннингемга қарши ўтказган. Аввалига у рақибини нокаут билан мағлуб этган, аммо кейинчалик станозолол моддасига ижобий допинг-тест сабаб натижа «амалга ошмаган жанг» сифатида ўзгартирилган. Антидопинг қоидаларини бузгани учун боксчи тўрт йилга мусобақалардан четлатилган, дисквалификация муддати 2026 йил 29 июлда тугаши керак эди. Шу муддат якунлангач, Тете профессионал рингга қайтишга ҳозиргарлик кўраётган эди.