Жаҳон чемпиони Файзуллаевга мураббийлик қилмайди

Москванинг ЦСКА клуби Фабио Каннаварога ҳеч қандай шартнома таклиф қилмаган, чунки клубда бош мураббий лавозимига Фабио Челестинининг тайинланиши аллақачон келишилган. Бу ҳақда Россиянинг "Чемпионат" нашрига вазиятдан хабардор манба хабар берди.

Аввалроқ италиялик журналист Николо Скира ЦСКА Каннаварога икки йиллик шартнома таклиф қилганини хабар қилганди.

51 ёшли Фабио Каннаваронинг сўнгги иш жойи Хорватиянинг "Динамо Загреб" клуби бўлган. У бундан олдин Италиянинг "Удинезе" ва "Беневенто" клубларида, Хитой терма жамоасида ҳамда бошқа бир қанча клубларда бош мураббий бўлиб ишлаган.

49 ёшли Фабио Челестини эса 2023 йилдан 2025 йилгача "Базель" клубида ишлаган. Бунгача у "Сьон", "Люсерн", "Лугано" ва бошқа клубларда фаолият юритган.

Аввалроқ армиячиларнинг бош мураббийи Марко Николич лавозимни тарк этганди — у Грециянинг АЭК клубига бош мураббий бўлиб ўтган. Николич қўл остида ЦСКА 2024/2025-йилги мавсумда Россия Премьер-лигасида учинчи ўринни эгаллаган ва Россия Кубогини қўлга киритган.