Жаҳон кубоги. Тўрабек Ҳабибуллаев финалга йўл олди

Хабарингиз бор, 31 мартдан 5 апрелгача Бразилияда бокс бўйича Жаҳон кубоги мусобақаси бўлиб ўтади.

Бугун ярим финал жанглари старт олади. Ушбу босқичга 8 нафар боксчимиз етиб келди ва бугун улардан 5 нафари рингга кўтарилиши режалаштирилган.

Ҳозиргина -90 кг да Тўрабек Ҳабибуллаев ва Ҳиндистон вакили Вишал жанги якунланди. Ҳамюртимизнинг катта устунлигида ўтган баҳс натижада ҳам ўз исботини топди. Тўлиқ давом этган тўқнашувда Ҳабибуллаев ҳакамларнинг якдил қарори билан ғалаба қозонди.

Маълумот учун, олдинда бизни Асилбек Жалилов ва Жадумани Манденгбам (Ҳиндистон) қарама-қаршилиги кутмоқда. Ушбу жанг, 4 апрель тонгида, тахминан, 04:15 да (Ўзбекистон вақти билан) старт олади.