Жаҳонгир Меҳмонов: Менинг

Наманганлик иқтидорли футболчи Жаҳонгир Меҳмонов ушбу мавсумдан бошлаб Термизнинг “Сурхон” клуби шарафини ҳимоя қиляпти. Кутилганидек, у жамоанинг асосий таркибидан муқим жой эгаллади.

Марказий ҳимоячи бўлишига қарамасдан, ҳаттоки гол ҳам уряпти. Меҳмоновга доим қизиқиш кўп бўлган ва ҳозир ҳам шундай. Охирги пайтларда эса Жаҳонгирнинг атрофида турли миш-мишлар ҳам тарқади. Яъни, унинг “Сурхон”ни тарк этиши тўғрисида хабарлар ҳам чиқди.

Шу баҳонада вазиятга ойдинлик киритиш асносида футболчи билан алоқага чиққанимиздан фойдаланиб, Суперлигадаги узилишлар, карантиннинг қандай фойдаси борлиги, клубдаги тақдири, футболчилар нега бир йиллик шартномалар тузаётгани ҳамда бош мураббий Равшан Ҳайдаров хусусида муносабатларини билдирди.

Чемпионатимизда юзага келган тўхталишларнинг

 футболчиларга қанчалик таъсири борлиги хусусида

-  Чемпионатнинг икки марта тўхтатилгани табиийки, жамоамизга ҳам қийинчилик туғдирди. Яқиндагина спорт формасига кираётганимизда яна тўхтатилди. Энди бўлса, яна шуғулланишда давом этяпмиз. Лекин илож қанча, ахир бу ПФЛнинг хоҳиши эмас-ку, ҳозирги шарт-шароитдан келиб чиққан ҳолда шундай ҳолат юз берди. Бу вазият барча клубларга қўшимча қийинчиликларни келтириб чиқарди. Аммо шуни ҳам унутмаслик керакки, футболимиз раҳбарияти бизнинг соғлигимизни ўйлаб шундай қарорлар қабул қилишган. Бу ҳамма учун яхшиликка. Қийинчилик бўлса-да, шароитдан келиб чиққан ҳолда тайёргарлик кўряпмиз.

Карантиннинг футболчиларга фойдали томонлари ҳам борми?

-  Қайсидир маънода фойдали томонлари бўлди ва яна қайсидир маънода бўлмади. Масалан, карантин пайтида уйда, оила даврасида кўпроқ бўлдик. Менимча, шу томони фойдали эди (кулади). Улуғ Рамазон ойида оила даврасида рўза тутиш биз учун яхши бўлди, деб ҳисоблайман. Агар спорт шароитида бўлганимизда рўза тутишга қийналардик. Аммо ишимиз нуқтаи назаридан қарайдиган бўлсак, бу ҳолат бизга катта зарар бўлди. Айниқса, спорт формасига қайтиш ўзига яраша қийин эди.

меҳмонов3_2

Меҳмонов “Сурхон”даги тақдирига ойдинлик киритди

-  Йўқ, менинг “Сурхон”дан кетишим ҳақидаги хабарлар нотўғри маълумотлар. Тўғри, менга таклифлар бўлди. Лекин кетиш ҳақида ўйлаб кўрганим йўқ. Негаки, “Сурхон” жамоаси билан мавсум охиригача шартнома тузганман. Шу боисдан бошқа таклифлар хусусида бош қотирмадим. Бу нарса ҳақида ўйлашга ҳаққим ҳам йўқ. “Сурхон”даги фаолиятимни давом эттираман, ўртада шартнома бор ва уни ҳурмат қилиш керак. Олаётган иш ҳаққимизни ҳам оқлаб, охиригача ўйнашимиз лозим.

Унга “Бухоро” ва яна қайси клублардан таклифлар бор эди?

-  Ҳа, таклифлар бор эди, ахир ўзидан-ўзи бундай чақирувлар бўлмасди. Лекин мен бу ҳақида ўйламадим. Энди уларнинг номларини айтишга ҳам ҳожат йўқ. Ахир шартнома бўйича ўз ишимни охиригача етказиб қўйишим керак.

Равшан Ҳайдаров ҳақида

-  Равшан ака Ҳайдаров жамоани яқинда қабул қилиб олган. Ўтган вақт давомида жамоага анча керакли нарсаларни сингдирди деб ўйлайман. Чемпионатимизнинг қолган ўйинларида қилаётган ишимизнинг маҳсулини кўрсатишга ҳаракат қиламиз. Равшан ака бош мураббийлигида ҳозирча иккита учрашувда иштирок этган бўлсак, ўша баҳсларда ниманидир кўрсатишга ҳаракат қилдик. Барибир катта тажрибага эга бўлган мураббийнинг қўл остида ўйнаш биз учун ёқимли. Ўйинларимизни телевизор орқали кўраётган мухлислар ҳам жамоамизда ижобий ўзгаришлар борлигини тасдиқлашяпти. Ҳайдаровдан ўрганишни бошладик ва у инсонга катта раҳмат айтмоқчиман.

меҳмонов2_2

Футболчилар кўпинча нега бир йиллик шартнома тузади? Ёки раҳбарларга ишонишмайдими?

-  Билмайман, ҳамманинг шароити ҳар хил. Йилнинг бошида футболчиларда таклифлар бўлади. Барчаси эса қандай келишишга боғлиқ. Агар ўйинчи бир йиллик шартнома тузмоқчи бўлса, клуб шунга қараб музокара ўтказади. Ёки клуб ўзининг шартини айтиши мумкин. Барибир ҳаммаси ҳозир айтганимдек, ўзаро келишувга боғлиқ.

 

Матнда хатолик топсангиз, ўша хатони белгилаб, бизга жўнатинг (Ctrl + Enter)