Жароҳати сабаб Лондон Олимпиадасига боролмаган юлдуз ҳақида

Оиладаги муҳит, ота-онасининг тўғри тарбияси, акаларининг спорт билан ҳамнафаслиги бўлмаганида Авазбек ҳам спортчи бўлмаган, буқадар салмоқли натижаларга эришмаган бўлармиди?!

Авазбек Коргановга бугун кўпчилик ҳавас қилади. Келинг, барчасини бошидан бошлаймиз. У 1988 йилда Чимкент шаҳрида туғилди. Авазнинг акалари Алишер ва Анвар дзюдо машғулотларига қатнар, катта-кичик мусобақаларда иштирок этиб, медалларни киритарди. Шу сабаб ёш Авазбекда ҳам дзюдога бўлган қизиқиш ортиб, ҳали мактабга қадам қўймасдан бурун Чирчиқ шаҳридаги "Кимёгар" спорт мажмуаси томон йўл олди. "Кимёгар"даги дзюдо секциясида илк устозлари, тажрибали мураббийлар Виктор Галкин ва Андрей Штурбабин қўл остида машғулотларга тезда киришиб кетди.

Авазбекдаги иқтидорни англаган мураббийлари уни беллашувларда синаб кўришга қарор қилишди. Дастлаб шаҳар, сўнгра вилоят биринчилигида ғалабалар қўлга киритилди. Ёш дзюдочи энди мамлакат миқёсидаги мусобақаларда иштирок эта бошлади. Илк бор 1999 йили Қарши шаҳрида ўтган ўсмирлар ўртасидаги Ўзбекистон чемпионатида 45 кг. вазн тоифасида иштирок этиб, олтин медалга сазовор бўлди. 

2000 йилда Самарқандда ўтган мамлакат чемпионатида учинчи, 2001 йил Қаршида ташкил этилган Ўзбекистон чемпионатида иккинчи, 2004 йил Хоразмда бўлган чемпионатда эса биринчи ўрин қўлга киритилди. 2005 йил Қаршида ўтган ёшлар ўртасидаги мамлакат чемпионатида яна шоҳсупанинг энг юқорисидан жой олди. Кетма-кет Ўзбекистон чемпионати ва турнирларда  кучли учликдан жой олиб келаётган Авазбек 2003 йилда Чирчиқ олимпия ва паралимпия спорт турларига тайёрлаш марказига (ўша пайтдаги Чирчиқ ОЗК) ўқишга қабул қилинди. Марказдаги дзюдо бўйича устозлари Искандар Расулов,  Сервер Муродасиловлар қўл остида машғулотларни давом эттирган Авазбек катталар ўртасидаги чемпионатларда ҳам иштирок эта бошлади.

2006 йил Самарқанд мезбонлик қилган катталар ўртасидаги Ўзбекистон чемпионатида 73 кг. да иккинчи, 2007 йили Чирчиқ шаҳрида ўтган мамлакат чемпионатида биринчи ўринни қўлга киритган Авазбекни миллий терма жамоасига қабул қилишди. Терма жамоа сафидан муносиб жой олган Авазбек Корганов 2007-2008 йиллари Эрон, Ҳиндистон, Қозоғистон давларида ташкил этилган халқаро турнирларда медалларни қўлга киритишга муваффақ бўлди. Терма жамоа бош мураббийи Андрей Штурбабин қўл остида шов-шувли натижларга эришиб бораётган Авазбек 2008 йили Япония пойтахти Токио шаҳрида ўтказилган дзюдо бўйича жамоавий жаҳон чемпионатида ўша пайтдаги энг номдор дзюдочилар Абдулла Тангриев, Ришот Собиров, Рамзиддин Саидов, Ўткир Қурбонов, Хуршид Набиев, Наврўз Жўрақобилов ҳамда Мирали Шарипов билан биргаликда жамоави  баҳсларда иккинчи ўринни эгаллашга муваффақ бўлишди.

Андрей Штурбабин бош мураббийлигидаги жамоага 2009 йил Туркияда, 2011 йил Эронда, 2012 йилда Тошкентда ўтган халқаро мусобақаларда кучли учликдан жой олиш насиб этди. "Лондон -2012"  олимпия ўйинларига етарлича очко тўплаган ҳолда бир олам орзулар билан машғулотларни давом эттираётган пайтда бехосдан орттирилган белдаги жароҳат Авазбекнинг энг нуфузли мусобақада иштирок этиш орзусини армонга айлантирди. Бироқ қаҳрамонимиз спортдан чекинмади. Жароҳати тузалгач яна спортга қайтди. Энди спортчи бўлиб эмас, дзюдо бўйича мураббий бўлиб қайтди.

Ўзбекистон давлат жисмоний тарбия ва спорт университетида Арслон Элов,  Шуҳрат Арслонов каби етук мутахассислар устозлигида таҳсил олиб, олий маълумотли мураббий дипломига эга бўлган Авазбек бир муддат Сергели туман спорт мактабида мураббийлик қилди. Сўнгра 2017 йилдан 2020 йилгача уч йил давомида Жанубий Кореяда ҳам дзюдодан мураббий сифатида фаолият кўрсатди. 
У 2021 йилдан бошлаб эса Чирчиқ шаҳар спорт мактабида дзюдодан ўғил-қизларга сабоқ бериб келмоқда. Авазбекнинг таъкидлашича, Спорт мактаби директори Сухроб Султонов бошчилигида болаларнинг спорт билан шуғулланишлари учунбарча шароитлар муҳайё этилган. Ҳозирда Авазбек Корганов қўл остида дзюдо сирларини ўрганаётган 50 нафардан ортиқ ўғил-қиз орасида иқтидорлилари талайгина.

Бекзод Адҳамов, Фирдавс Фоворисов, Ашраф Қурбонов, АзизбекТурсунбоев сингари шогирдлари устози каби мусобақаларда муваффақиятли иштирок этишни мақсад қилишган ва бунга эришмоқдалар. Дзюдо бўйича халқаро тоифадаги спорт устаси ва йирик халқаро мусобақаларнинг шода-шода медаллари соҳиби ҳисобланган қаҳрамонимиз ҳозирда Чирчиқ шаҳар спорт мактабида дзюдо бўйича олий тоифали мураббийи бўлиб фаолият юритмоқда.  Дарвоқе, Авазбек Корганов спортдаги юришиниҳам давом эттирмоқда.

У 2023 йилда Абу Даби шаҳрида фахрийлар ўртасида дзюдо бўйича ташкил этилган жаҳон чемпионатида 81 кг. да бронза медалини қўлга киритган бўлса, жорий йил Латвиянинг Рига шаҳридаги Европа очиқ чемпионатида олтин медалга сазовор бўлди.  Польшада ўтказилган Европа очиқ чемпионатида ҳам бронза медалига эришганди. Эндиги бор эътибор ноябрь ойида фахрийлар ўртасида АҚШнинг Лас-Вегас шаҳри мезбонлигида ўтадиган жаҳон чемпионатига қаратилган. Ҳа, Авазнинг  акалари мамлакат чемпиони бўлишганди. Алишер Корганов дзюдо бўйича халқаро тоифадаги ҳакам, Анвар эса дзюдо бўйича Ўзбекистон чемпиони ва турнирлар ғолиби сифатида танилганди. Кўз тегмасин, Авазбекнинг натижалари янада залворли бўлмоқда.

Демак, инсон ўз матонати, меҳнати ва иродаси билан барча ҳавас қиларли ютуқларга ва ибратли ҳаёт йўлига эришмоғи мумкин экан... 
                                                                                                                                           

                                                                                                                            Илҳом Раҳмонов тайёрлади