ЖЧ-2022. Лионель Месси Саудия Арабистонига қарши ўйин олдидан: "Бу охирги имконият"

Жаҳон чемпионати 1-туридан ўрин олган Аргентина - Саудия Арабистони учрашувидан олдин ташкил этилган матбуот анжуманида "альбиселесте" сардори Лионель Месси иштирок этди.

"Бу мен учун сўнгги Жаҳон чемпионати бўлса керак. Орзуни рўёбга чиқариш йўлидаги охирги имконият".

- Аргентинанинг аввалги мундиаллар очилиш ўйинларидаги муваффақиятсизликларидан қандай хулоса чиқардингиз?

"Доим ўрганганимиздек ўйнашимиз лозим. Ўзимизни яхши ҳис қилмоқдамиз. Бизни қийин баҳс кутяпти, чунки бу биринчи тур. Асабийлик ва хавотирни енгишимиз даркор. Дастлабки сонияларданоқ фақат футбол ҳақида ўйлашга ҳаракат қилишимиз керак".

- Бутун дунёда сизларнинг ЖЧда ғалаба қозонишингизни исташади.

"Ҳа, бизни жуда кўпчилик қўллаб-қувватлаётгани ажойиб. Бу мени янада кўпроқ хурсанд қилади. Фаолиятим давомида кўрганларимдан миннатдорман".

- Бутун араб олами Мессини яхши кўради. Аммо эртага улар саудияликлар тарафида бўлади...

"Мен дунёнинг турли чеккаларида мени яхши кўришларини биламан. Бироқ ҳар бир миллат учун ўз жамоаси доим энг суюклиси бўлади. Биз ғалаба қозониб, 3 очкони қўлга киритишга ҳаракат қиламиз",-дейди 35 ёшли футболчи.

Эслатиб ўтамиз, Аргентина - Саудия Арабистони ўйини 22 ноябрь куни Тошкент вақти билан соат 15:00 да бошланади.