"ЖЧ-2026"да сариқ карточкалар бўйича янги қоида жорий этилиши мумкин

2026 йил АҚШ, Канада ва Мексикада ўтадиган жаҳон чемпионатида сариқ карточкаларнинг бекор қилиниши икки босқичда амалга оширилиши мумкин.

"BBC Sport" маълумотига кўра, иштирокчилар сони 48 тага, ўйинлар сони эса сезиларли оширилгани сабаб ФИФА янги тартибни жорий этишни кўриб чиқмоқда. Унга кўра, йиғилган сариқ карточкалар гуруҳ босқичидан кейин ҳамда чорак финаллардан сўнг “куйдирилади”.

Амалдаги қоидаларга кўра, жамоа чорак финалга чиқиши учун бешта ўйин ўтказиши керак ва шу даврда олинган икки сариқ карточка кейинги учрашувни ўтказиб юборишга сабаб бўлади.

"ЖЧ-2026"да илк бор 1/16 финал босқичи ҳам бўлиши туфайли дисквалификация хавфи ошиб кетиши мумкинлиги таъкидланмоқда. ФИФАда кўплаб футболчилар ярим финални ўтказиб юбориши мумкинлигидан хавотир бор.

Манбага кўра, икки босқичли бекор қилиш тизими учта сариқ карточкадан кейин четлатиш қоидасидан кўра адолатлироқ ҳисобланмоқда. Агар таклиф қабул қилинса, футболчи гуруҳ босқичидаги уч ўйиннинг иккитасида ёки плей-оффнинг 1/16, 1/8 ва чорак финал баҳсларидан иккитасида огоҳлантириш олсагина ўйинни ўтказиб юборади.

Мазкур масала сешанба куни Ванкуверда бўлиб ўтадиган ФИФА Кенгаши йиғилишида муҳокама қилинади.