"Женоа" - "Лацио": Шомуродов майдонга тушди! (матнли трансляция)

Ассалому алайкум, қадрли футбол ихлосмандлари! Италия А серияси 15-туридан ўрин олган "Женоа" - "Лацио" баҳси бошланиш арафасида. Сайтимиз уни сизга онлайн матнли кўринишда тақдим этади. Матнли трансляцияни Абдулла Маннонов олиб боради.

• 90+3'
  

  Учрашув якунланди! Ҳамюртимиз Элдор Шомуродов бир тайм ҳаракат қилиб, ассист амалга оширган ўйинда "Женоа" "Лацио" билан дуранг ўйнади. Матнли трансляцияни Абдулла Маннонов олиб борди. Эътиборингиз учун раҳмат!

• 90+2'
  

  Римликлар аъзоси Гонсало Эскаланте ўйин қоидасини бузди ва сариқ карточка билан жазоланди.

• 90+1'

  Сўнгги дақиқалар жуда қизғин тарзда ўтмоқда.

• 90+'
  

  Учрашувга 3 дақиқа вақт қўшиб берилди.

• 89'
  

  "Лацио"да сўнгги ўзгариш: Луис Альберто ўрнига Акпа Акпро майдонга тушди.

• 87'

  Скамакка қўпол ўйнади. Ҳакам уни оғзаки огоҳлантирди.

• 85'
  

  Андреас Перейра бурчакдан тўпни жарима майдони ичига етказиб берди, 11 метрлик нуқтадан боши билан зарба берган Иммобилега эса бироз аниқлик етишмади. Тўп юқорилаб кетди.

• 84'

  Мануэль Лаццарри яна дриблингини намойиш этди ва бурчак тўпи ишлаб олди.

• 83'
  

  "Лацио" 3 дақиқа ичида кетма-кет 3 та бурчак тўпи тепди, бироқ уларнинг биронтасидан натижа чиқара олмади.

• 81'
  

  "Лацио"да 2 ўзгариш: Кайседо ва Савич ўрнига Андреас Перейра ва Мурики майдонга тушди.

• 80'

  Иммобиленинг узатмасини ҳимоячилар бурчакка чиқариб юборди. "Лацио" бурчак тўпи тепади.

• 78'

  Мануэль Лаццаррининг жарима майдони ташқарисидан берган кучли зарбасини дарвозабон ушлаб қолди.

• 75'

  Элдор майдонга тушгач ўйин росмана маънода қизиб кетди!

• 74'

  Элдор Шомуродов ажойиб рейд билан ҳимоячиларни ортда қолдирди ва зарба берди, бироқ сўнггги сонияда унинг зарбаси ҳимоячи томонидан блокланди!

• 72'
  

  "Женоа"да ўзгариш: Бехрами ўрнига Лерагер майдонга тушди.

• 70'

  Ух қандай вазият! Элдор Шомуродов 2 ҳимоячини ортда қолдириб қийинчилик билан дарвозага зарба берди, зарба эса дарвоза устунидан бир неча сантиметр ёнроқдан ўтиб кетди! Зарба аниқ бўлганида Пепе Рейна унга улгурмас эди.

• 69'
  

  Ҳозиргина сариқ карточка олган Лукас Лейва майдонни тар этиб, ўрнига Гонсало Эскаланте майдонга тушди.

• 68'
  

  Лукас Лейва ўйин қоидасини бузди ва сариқ карточка билан жазоланди.

• 67'

  "Лацио" футболчиси бирга-бир вазиятга чиқиб кетиши мумкин эди, бироқ ҳимоячи чаққонлик қилди.

• 66'

  Ҳаммаси жойида. Ҳакам ўйинни давом эттиришга руҳсат берди.

• 65'

  Давиде Заппакоста ўз жарима майдони ичида тўпни қўл билан ўйнаб юборди. Бош ҳакам ВАРга мурожаат қилмоқчи. Яна пенальти белгиланиши мумкин.

• 63'
  

  Мартен Чиборра қўполлиги эвазига сариқ карточка олди.

• 61'
  

  Ҳозиргина гол урган Маттиа Дестро майдонни тарк этиб, ўрнига Жанлука Скамакка майдонга тушди.

• 61'

  Сергей Милинкович-Савич "Женоа"нинг қарши ҳужумга ўтиб кетаётган футболчисини йиқитиб юборганлиги боис сариқ карточка олди.

• 60'
  

  Гол нишонлашда футболкасини ечгани учун Дестро карточка билан огоҳлантирилди.

• 59'
  

  ГООООООООООООООООООЛЛЛ!!! Элдор Шомуродовнинг супер фаоллиги эвазига "Женоа" ҳисобни тенглаштирди! Унинг ажойиб пасини Дестро дарвозага жойлаб қўйди! Баракалла, Элдор!

• 58'
  

  Римликлар бурчак тўпидан унумли фойдалана олмади. "Женоа" қарши ҳужумда.

• 57'

  "Лацио" хавфли ҳужум ташкил этиб, бурчак тўпига эга чиқди.

• 55'

  Чиро Иммобиле майдон марказида Радовановичга нисбатан қоида бузди. Ҳуштак чалинди.

• 53'

  Бадель Шомуродовни бирга-бир вазиятга чиқариб юборувчи пасни берганди, бироқ ҳимоячи тўпга Элдордан олдинроқ эга чиқди! Ҳужум иккинчи темпда давом этади.

• 52'
  

  Миха Зайц бурчакдан узатган тўп анча хавфли чиқди, ҳимоячилар Элдорни алоҳида қўриқлашмоқда.

• 50'
  

  2-бурчак тўпи хавфли чиқмади.

• 49'
  

  "Лацио" бурчак тўпи ижро этди, ҳимоячилар тўпни қайтаришди, қайтган тўпни яна дарвозага йўналтиришди, тўп дарвозага кириб кетай деди. Бироқ бурчак тўпи.

• 48'
  

  Фелипе Кайседо офсайдда қолиб кетди.

• 47'
  

  "Женоа"да яна бир ўзгариш: Николо Ровелла ўрнига Миха Зайц майдонга тушди.

• 46'
  

  Ваниҳоят биз кутган ўзгариш: Марко Пьяца ўрнига ҳамюртимиз Элдор Шомуродов майдонга тушди! Ундан албатта гол кутамиз!

• 46'
  

  2-таймни "Лацио" ўзгариш билан бошлаб олди: Патрик Габаррон ўрнига Луис Фелипе майдонга тушди.

• 46'
  

  2-таймга старт берилди.

• 45'

  Футболчилар ва Шомуродов майдонга қайтишмоқда. Биз ҳам қайтамиз.

• 45+2'
  

  1-бўлим якунланди. Танаффус. 2-таймда ҳамюртимизни майдонда кўрамиз деган умиддамиз.

• 45+'
  

  1-таймга 2 дақиқа вақт қўшиб берилди.

• 45'
  

  "Лацио" футболчиси Штефан Раду офсайдда қолиб кетди.

• 44'
  

  Қўпол подкати учун "Лацио" футболчиси Патрик Габаррон сариқ карточка билан жазоланди.

• 43'
  

  "Женоа" бурчак тўпидан хавфли вазият юзага келтира олмади. Тўпни римликлар эгаллаб олди.

• 42'
  

  Марко Пьяца жарима майдони ташқарисидан тўпни дарвозага йўллади, меҳмонлар посбони Пепе Рейна эса тўпни бурчакка чиқариб юборди.

• 40'

  Чиро Иммобиле жарима майдони ичида тўпни қабул қилиб олди ва дарвозага зарба йўллади. Бироқ унинг зарбасида аниқликдан бошқа ҳамма нарса бор эди.

• 38'

  "Женоа" жарима майдони ичига узатма амалга оширди, жарима майдони ичида палапартиш вазият юзага келганига қарамай "Лацио" футболчилари вазиятни бартараф этишди. Тўпни меҳмонлар дарвозадан ўйинга киритиб беради.

• 37'

  Лукас Лейва тўпга қўпол тарзда чиқиб келди, ҳакам ўйинни тўхтатди.

• 35'
  

  Мартен Чиборра ("Женоа") бурчак тўпини ижро этди, римликлар ҳимояси эса бехато ўйнади.

• 34'
  

  Мажбурий ўзгариш: жароҳат олган Сапата майдонни тарк этиб, ўрнига Иван Радованович ўйинга қўшилди.

• 33'
  

  "Женоа" аъзоси Кристиан Сапата тўпга кураш вақтида жиддий шикастланди ва майдонда тиббий ёрдам олмоқда. У ўйинни давом эттира олмайди.

• 32'

  Мануэль Лаццаррида гол уриш учун ажойиб вазият юзага келди, бироқ унинг зарбаси ўнг устуннинг ёнгинасидан ўтиб кетди! Голга бир неча сантиметрлар ҳалақит берди.

• 30'
  

  Лайнсмен байроғини кўтарди: Маттиа Дестро офсайдда қолиб кетди.

• 28'

  Ух қандай имконият! Фелипе Кайседо ажойиб кроссни боши билан дарвозага йўналтирди, бироқ тўп устуннинг ёнгинасидан ўтиб кетди.

• 26'

  Омадсиз зарба. Римликлар футболчиси Луис Альберто жарима майдони ташқарисида туриб тўпни дарвозага йўналтирди, бироқ тўп дарвозанинг анча юқорисидан ўтиб кетди.

• 25'

  Сергей Милинкович-Савич ва Фелипе Кайседо бугунги ўйиннинг энг яхши жуфтлиги бўлмоқда. Улар бутун майдон бўйлаб тўпни бир-бирига ошириб ҳаракат қилишди. Бу манзара жуда чиройли чиқди.

• 23'

  Жарима зарбасини ижро этган Милинкович-Савичнинг зарбаси дарвозанинг бирозгина юқорисидан ўтиб кетди!

• 22'
  

  Маттиа Перин Фелипе Кайседонинг ўта хавли, гол билан якунланиши мумкин бўлган зарбасини қийинчилик билан қайтариб қолди!

• 21'

  "Лацио" яримҳимоячиси Адам Марушич қанотдан тўпни ичкарига ажойиб тарзда етказиб берди, бироқ ҳимоячилардан бири тўпни боши билан узоқлаштирди.

• 19'

  "Женоа" хавфли бурчак тўпини ижро этди, бироқ ҳимоячилар фаоллик қилди.

• 18'

  Маттиа Дестро рақиб жарима майдони ичига ёриб кирди ва энди зарба бермоқчи бўлганида ҳимоячи тўпни ундан олиб қўйди.

• 17'

  Мезбонлар аъзоси Андреа Мазьелло қўпол ўйнади, бош ҳакам уни оғзаки огоҳлантирди.

• 15'
  

  ГОООЛ!!! Иммобиле 11 метрлик нуқтадан тўпни дарвозанинг пастги бурчагига жойлаб қўйди! Дарвозабон бу вазиятда мутлақо ожиз қолди.

• 14'
  

  Пенальти! ВАР пенальти бор деб топди ва буни бош ҳакамга етказди. Чиро Иммобиле уни ижро этади!

• 13'

  Ўйин тўхтатилди! "Лацио" пенальти тепиши мумкин: бош ҳакам видеотакрорларга мурожаат қилмоқда.

• 13'

  "Женоа" футболчиси Кристиан Сапата қўпол ўйнади. Ҳакам ҳуштак чалиб, уни оғзаки огоҳлантирди.

• 12'
  

  "Лацио" бурчак тўпидан яхши фойдалана олмади. Ҳимоя яхши ҳаракат қилди ва тўпни узоқлаштирди.

• 12'

  Чиро Иммобиле қанотдан узатилган тўпни боши билан дарвозага йўллаши мумкин эди, бироқ ҳимоячи тезкорлик билан ҳаракат қилиб, тўпни ташқарига чиқариб юборди.

• 11'

  Доминико Кришито ўта агрессив ўйнаяпти. Ҳакам уни оғзаки огоҳлантирди. Кейинги сафар у жазоланиши мумкин.

• 10'

  Тўп назоратида римликлар устунлик қилишмоқда: 29-71!

• 8'

  Меҳмонлар футболчиси Адам Марушич тўпга хавли чиқиб келди ва рақибини йиқитиб юборди. Ҳакам фол қайд этди.

• 6'

  "Лацио" футболчиси рақиб ҳужуми пайтида бироз қўпол ўйнагандек кўринди, бироқ ҳакам ҳаммаси жойида эканлигини ва ўйинни давом эттириш мумкинлигига ишора қилди.

• 5'

  Бош ҳакам Жанпаоло Кальварезе ҳуштагини чалди. Сергей Милинкович-Савич хавфли ўйнади.

• 4'

  Сергей Милинкович-Савич жарима майдони ичига тўпни узатиб берди, бироқ ҳимоячилар яхши ўйнаб, вазиятни бартараф этишди.

• 3'
  

  Тўп "Женоа" футболчисидан майдон ташқарисига чиқиб кетди. Ҳакам бурчакни кўрсатди. Луис Альберто уни ижро этгани йўл олди.

• 2'

  "Лацио" илк дақиқалардан ҳужумга ўтишга ҳаракат қилди. Милан Бадель рақибини қўполлик билан тўхтатиб қолди ва ҳакам ҳуштагини чалди.

• 1'
  

  Учрашув бошланди! Шомуродов захира ўриндиғида.

• 0'

  Футболчилар майдонга чиқиб келишмоқда. А серия мадҳияси янгради.

• 0'

  Ассалому алайкум, қадрли футбол ихлосмандлари! Италия А серияси 15-туридан ўрин олган "Женоа" - "Лацио" баҳси бошланиш арафасида. Сайтимиз уни сизга онлайн матнли кўринишда тақдим этади. Матнли трансляцияни Абдулла Маннонов олиб боради.