Ўзбекистон миллий терма жамоаси жаҳон чемпионатига чиқиши шарт! Бутун бошли ҳалқ терма жамоа либосида майдонга тушадиган 11 йигит ва бош мураббийдан максималини талаб қилади. Ва ниҳоят, Вадим Абрамов расмий ўйинларда асосий таркибдан ўрин олиши мумкин бўлган футболчиларни Тошкентга чақирди. Мутахассис иккита ўртоқлик учрашуви мобайнида энг кучли Ўзбекистонни бизга тақдим этишга ҳаракат қилиб кўради. Бунда катта саҳнага хорижда тўп тепаётган футболчиларимиз чиқиши табиий. Биз эса ушбу йиғинга жалб этилган легионерларимизнинг клублари айни дамда қай аҳволда эканлиги ҳақида сўз юритамиз.

image_2021-01-11_18-13-55

Отабек Шукуров “Шаржа”

Шукуров ҳаракат қилаётган “Шаржа” клуби бир неча йиллардан буён барқарор ўйин намойиш этиб келмоқда. Шу жумладан, жорий мавсумда ҳам "Шаржа" клуби чемпионлик учун жиддий кураш олиб боряпти. Биринчи даврани пешқадам сифатида якунлаган жамоа кейинчалик бироз оқсади. Шаржаликлар ҳозир БАА чемпионатида 3-поғонани банд этган. Доимий равишда бош соврин учун кураш олиб борадиган клуб учун кучли учлик етарли эмас. 22-турдан кейин 41 очко тўплаган жамоа пешқадамдан 7 очко ортда бормоқда. Тезроқ отни қамчиламаса, Шукуров жамоаси олтин медаллардан қуруқ қолиши ҳеч гап эмас.

photo_2021-01-16_02-37-22

Жалолиддин Машарипов ва Одил Ҳамробеков “Шабаб Ал-Аҳли”

“Шаржа”дан фарқли ўлароқ, “Шабаб Ал-Аҳли”да яхшигина прогресс кузатилмоқда. Дубай клуби ўз таркибига Машарипов ва Ҳамробековни қўшиб олганидан бери мағлубият нималигини билмай келмоқда. Жамоанинг трансфер сиёсатига ҳавас қилса арзийди. Боиси, улар қитъа даражасидаги футболчиларни бир таркиб остида жамлай олган. Энг қизиғи, улар бу йўлда катта маблағ сарфламади.

Ҳамюртларимиздан ташқари, Омар Абдулраҳмонни ҳам ўз сафига қўшиб олган “Шабаб Ал-Аҳли” бу “юришлар”и самараси ўлароқ, 4-ўрингача кўтарилди. Шу темпни йўқотиб қўймаса, дубайликлар чемпионлик учун тўғридан-тўғри даъвогарга айлана олиши тайин.

masharipov

Достонбек Ҳамдамов “Хатта”

“Хатта” таркибига ижара асосида бориб қўшилган Ҳамдамов умуман ўзига ўхшамаяпти. У билан бир вақтда араб диёрига кетган Машариповдан фарқли ўлароқ, у ҳали бирорта самарали ҳаракатни амалга оширганича йўқ. Аутсайдер клубда йўқолиб қолган легионеримиз атиги 2 ўйинда тўлиқ ҳаракат қилди, холос. Унинг жамоаси турнир жадвалида сўнгги ўринда бормоқда. 22 ўйинда 8 очко жамғарган “Хатта”нинг энг катта муаммоси гол уриш. Улар атиги 13 бор рақиб дарвозасини ишғол этишга муваффақ бўлган. Ушбу клуб либосида ўзини кўрсата олмаса, легионеримизга “Ал-Наср”да осон бўлмаслиги тайин.

hamdamov

Остон Ўрунов “Уфа”

Ўрунов билан ҳам шунга ўхшаш ҳолат кузатилмоқда. РПЛни тарк этиш арафасида турган уфаликлар жуда ёмон ҳолатга тушиб қолган. Жамоа сўнгги бор ички чемпионатда 6 декабрь куни “Ростов” устидан ғалаба қозонганди. “Уфа” ўйинига эътибор қаратсак, бирдамлик ва ҳужумкор футболни қидиришга катта вақт сарфлаймиз. Шу кетишда клуб қуйи дивизионга тушиб кетиши катта эҳтимол. Уларнинг ҳолати шу даражадаки, жамоа банкротлик ёқасида турган “Тамбов”дан 1 очкогина кўп жамғарган, холос. Ҳали РПЛ якунига қадар 7 та тур борлигини инобатга олсак, Ўрунов жамоасида элитада жон сақлаб қолиш учун кичик бўлсада имконият мавжуд. Фақатгина ўтган мавсумда кўрсатилган ўйинлар яна намойиш этилса бўлгани.

urunov

Элдор Шомуродов “Женоа”

Ўзбек футболининг бутун Италиядаги юзига айланган Элдор Шомуродов “Женоа”нинг муваффақиятларида ўз ўрнига эга бўлиб улгурди. Тўғри, сўнгги турларда легионеримиз бироз ўзига ўхшамаётган бўлсада, жамоаси хавфли ҳудуддан узоқлашиб олди. Ҳозир генуяликлар 13-ўринда ва Б Серияга тушиб кетишдан умуман хавфсирамаяпти. Сабаби, Давиде Баллардини бош мураббий этиб тайинланганидан сўнг, Шомуродов жамоаси анча рақобатбардош клубга айланди. Аслида, италиялик мутахассис таркибга ҳеч қайси футболчини олиб келмади. Шунчаки жамоавий бирдамликни қайтарди, холос. Ўз навбатида, бу легионеримизнинг ўйинига ҳам анча ижобий таъсир кўрсатди. Энди Элдор гол ва ассистларни ўз ҳисобига ёздириб қўймоқда. Унга гранд клублардан қизиш бўлганлиги ҳам унинг меҳнатлари самараси ҳисобланади. Ҳар ҳолда, “Ювентус”дек жамоанинг қизиқишлари доирасига шунчаки тушиб қолиш ҳам катта ютуқ, назаримизда.

gettyimages-1231285678-2048x2048

Шаҳзод Убайдуллаев “Шахтёр” Солигорск

Беларуснинг амалдаги чемпиони сафига бориб қўшилган Убайдуллаев дарҳол ўзини кўрсата бошлади. Умумий ҳисобда 110 дақиқа майдонда ҳаракат қилган вакилимиз ўз ҳисобига 1 гол ва ассистни ёздириб қўйишга муваффақ бўлди. Беларусь чемпионати энди бошланганини инобатга олсак, ҳали Шаҳзодда ўзини кўрсатиш учун катта имконият мавжуд. Ушбу биринчилик Европанинг бошқа кучлироқ чемпионатларига йўл олиш учун ажойиб имконият эканлигини Жасурбек Яхшибоев мисолида кўрдик. Бу ҳолат Убайдуллаев билан ҳам такрорланиши Ўзбек футболи учун катта ютуқ бўлиши шубҳасиз. Қанчалик ёрқин юлдуз бўлмасин, биз Элдор Шомуродовнинг ўзигагина ишониб қола олмаймиз. Терма жамоа ҳужум чизиғидаги рақобат ҳар учала ҳужумчимиз учун зарур.

ubaydullaev.jpg1

Игорь Сергеев “Актобе”

Миллий терма жамоа либосида бир неча йиллар давомида ҳаракат қилиб келаётган Сергеев ҳозир легионер мақомида тўп тепмоқда. Қозоғистон Премьер-лигасининг “Актобе” клуби сафига бориб қўшилган ҳамюртимиз иккита ўйинда тўлиқ ҳаракат қилди. Бундан кўриниб турибдики, янги жамоасида унга бутунлай ишонч билдириляпти. Қувонарли жиҳати, ”Тобол”га қарши баҳсда Игорь ўз исмини таблога ёздириб қўйишга муваффақ бўлди. Якунда унинг бош билан урган голи жамоасига 1 очко келтирди. Шомуродов ва Убайдуллаев каби Сергеев учун ҳам рақобат фойда келтириши аниқ. Чунки энди терма жамоа бош мураббийи учун Игорь Сергеев ягона вариант эмас.

sergeev

Ҳозир фақатгина март ойидаги йиғинга жалб этилган легионер футболчиларимиз ҳақида фикр алмашдик. Ушбу рўйхатимиздан Одил Аҳмедов, Жасурбек Яхшибоев, Бобир Абдухолиқов, Жамшид Искандеров, Рустам Ашурматов, Достон Ибрагимов ва яна бир неча  хориж клубларида тўп тепаётган футболчиларимиз тушиб қолди. Кейинги йиғинларда Абрамов уларни терма жамоага жалб этса, ушбу мақоламизни янги сонидаги легионерларимиз сафини кенгайтирамиз.

Жавоҳир Азимов тайёради

Матнда хатолик топсангиз, ўша хатони белгилаб, бизга жўнатинг (Ctrl + Enter)

Минбар

Барча блоглар