“Женоа” трансфери барбод бўлди. Шомуродовга бошқа рақобатчи келади

“Женоа” раҳбарияти ЦСКАнинг аргентиналик ҳужумчиси Адольфо Гайч трансфери бўйича москваликлар билан музокара олиб бораётган эди.  Истеъдодли футболчининг ўзи ҳам Элдор Шомуродов жамоасига кўчиб ўтишга розилик берганди.

Россия оммавий ахборот воситалари тарқатаётган хабарларда бу трансфер амалга ошмаслиги ва томонлар музокарани тўхтатгани ёзилмоқда.

Маълумотларга қараганда, генуяликлар Адольфо Гайчни ярим йилга ижарага олишни истаган. ЦСКА эса, ижара муддатини бир ярим йил қилиб белгилаган.

Энди Давиде Баллардини жамоа ҳужум чизиғига “Аталанта” вакили Сэм Ламмерсни олиб келмоқчи. Нидерландиялик ҳужумчи ҳозирги жамоаси сафида А Серияда 10 та учрашувда иккита гол уришни уддалади.

ЦСКА эса Адольфо Гайчни “Балонья” ва “Парма”га трансфер қилиш бўйича ишни давом эттиради.