Жеррард: Клопп мураббий бўлишимда катта ёрдам берди

Стивен Жеррард “Ливерпуль” бош мураббийи Юрген Клопп билан ишлаш жараёнида жуда кўп тажриба тўплагани ҳақида гапирди.

“Юрген Клопп футболни жуда яхши тушунади. Ёшлар жамоасида ишлаганимда у менга ақл бовар қилмайдиган даражада ёрдам берди. Ундан жуда қимматли маслаҳатлар олдим. У билан ишлаш менга мураббийлик касбини эгаллашимда ёрдам берди”, - деди Жеррард Liverpool Echo нашрига берган интервьюсида.

Эслатиб ўтамиз, афсонавий футболчи профессионал фаолиятини якунлаганидан сўнг, "Ливерпуль"нинг ёшлар академиясида мураббийлик қилди, шундан сўнг у Шотландия гранди - “Рейнжерс” жамоасини бош мураббийи сифатида муваффақиятга эришди. 2021-2022 йилларда Жеррард "Астон Вилла"ни бошқарди. Айни дамда 42 ёшли мутахассис ишсиз ҳисобланади.