Жозе Алдо: "Мен мағлубият учун эмас, реванш бўлмаслигини билганим учун йиғлагандим"

UFC собиқ чемпиони Жозе Алдо ирландиялик Конор Макгрегорга қарши мағлубиятдан кейин кийиниш хонасида йиғлагани сабабини тушунтирди. Бразилияликнинг айтишича, унинг кўз ёшларига мағлубият эмас, реванш имкониятининг йўқолгани сабаб бўлган.

"Мен йиғладим, чунки мағлубиятдан кейин: "Энди реванш бўлади, ахир мен узоқ вақт давомида ҳукмрон чемпион эдим", деб ўйлагандим. Ўша пайтгача UFC тарихидаги ярим енгил вазндаги биринчи ва ягона чемпион эдим. Шунинг учун хаёлимда: "Биз яна жанг қиламиз ва бу сафар ҳаммаси бошқача бўлади", деган фикр бор эди.

Кейин Дана кийиниш хонасига кириб келиб, Конор энди бу вазнга туша олмаслигини, шунинг учун реваншни ташкил қилиб бўлмаслигини айтди. Унинг сўзларига кўра, Конор енгил вазнга ўтаяпти, чунки 145 фунтга вазн тушириш у учун жуда оғир бўлиб қолган ва буни энди давом эттира олмас экан. Натижа қандай бўлишидан қатъи назар, бу унинг ярим енгил вазндаги охирги жанги бўлган.

Шунинг учун йиғлагандим. Кўпчилик мени мағлубият учун йиғлаган деб ўйлайди. Ўша мағлубият учун реванш олиш имконияти менда қолмаганди", — деди Алдо.