Кака, Хамес, Азар - Перес давридаги энг катта трансфер хатолари!

"Реал" барча даврларнинг энг кучли жамоалари қаторида эътироф этилади. Мадридликлар ички миқёсда "Барселона", "Атлетико", халқаро майдонда "Бавария", "Ювентус", "Ливерпуль" каби грандлар билан тенгма-тенг рақобат олиб боришни истайди ва бу йўлда академиянинг ўзигагина таяна олмаслигини яхши тушунади. Шу сабабли, "Қироллик клуби" президенти Флорентино Перес тез-тез катта трансферларга қўл уради. Улардан аксарияти ўзини оқлаган бўлса, баъзилари омадсизликка юз тутган. Роналду, Ўзил, ди Мария, Бензема, Варан, Модрич, Кроос каби трансферларга ҳурмат сақлаган ҳолда, Флорентино Переснинг иккинчи президентлик давридаги(2009 йилдан ҳозиргача) энг омадсиз трансферлар ҳақида суҳбатлашамиз.

perez

Кака

2009 йилги президентлик сайловида ғалаба қозониш учун катта ваъдалар берган испаниялик ишбилармон ўз сўзининг устидан чиқди, дейиш мумкин. Илк мавсумдаёқ,"Қироллик клуби" трансфер бозоридан рекорд миқдорда харажат билан чиқди. Ўшанда "қаймоқранглилар" либосини кийган футболчилардан бири Кака эди. Бир йил аввал "Олтин тўп"ни қўлга киритган бразилиялик юлдуз 67 млн евро эвазига Мадридга кўчиб ўтди. Тан олиш керак, қаҳрамонимиз "Сантьяго Бернабеу"даги илк мавсумини ёмон ўтказмади. 33 баҳсда 9 гол ва 12 ассист. Бироқ йилдан йилга Кака ўйинида пасайиш кузатила бошлади ва оқибатда, 2013 йилнинг сентябрь ойида у "россонерилар" сафига қайтариб юборилди. Энг ёмони, энди Кака эркин агент сифатида ўзи учун қадрли Миланга қайтган эди. Аксарият футбол ихлосмандлари айнан унинг синишида айбни "Реал"га тўнкайди ва у жамоани ёмон кўради. Бразилиялик ярим ҳимоячи Мадриддаги бутун фаолияти мобайнида 120 учрашувда клуб шарафини ҳимоя қилиб, 29 та гол урди ва 39 бор шериклари голига ҳаммуаллифлик қилди. Қаҳрамонимиз ўз фаолиятини 2017 йилда океанортида якунлади. Унинг сўнгги жамоаси "Орландо Сити" бўлди.

kaka_1

Нури Шахин

"Боруссия" Дортмундда етилиб келаётган яна бир юлдуз - Нури Шахин тезда омма эътиборига тушди. Ўша даврда Юрген Клопп қўл остида йиғилган жамоанинг асосий таркиб вакилларидан бири Шахин фаолиятини "Реал"да давом эттиришга қарор қилди. Унинг бу фикри хатолиги исботланиши кўп вақт талаб этмади. Илк мавсумидаёқ, тиззасидан оғир жароҳат олган немис ярим ҳимоячиси йилни атиги 10 та ўйин билан якунлади. Чемпионлар Лигасидаги 4 баҳсда ҳеч қачон 80-дақиқадан эрта майдонга тушмади. Ла Лига ўйинларида ҳам фақат "Реал" ишончли ҳисобда ғалаба қозонган пайтда захирадан ўйинга қўшилган. Ачинарлиси, "қаймоқранглилар" уни бир мавсумнинг ўзида иккита клубга ижарага берди. Сентябрдан январгача "Ливерпуль"да вақт ўтказган қаҳрамонимиз, июнгача "Боруссия"га йўл олди. У ерда 1,5 мавсум ҳаракат қилгач, "асаларилар" унинг трансфер ҳуқуқини сотиб олди. Қизиғи, Шахин ҳали-ҳамон футболчилик фаолиятини давом эттирмоқда. У Туркия Суперлигасида иштирок этувчи "Антальяспор" жамоаси шарафини ҳимоя қилиб келмоқда.

sahin_1

Хамес Родригес

"Жаҳон чемпионати - 2014" гуруҳ босқичидан ўрин олган учрашувлар, Бразилияда бўлиб ўтган мундиалнинг ҳақиқий Лотин Америкасига хос бўлган техника ва дриблингга бой ўйинлари! Ўшанда Колумбия терма жамоасини олдинга етаклаган Хамес исмли ёш юлдуз эсингиздами?! Ҳатто, турнир якунида унинг Уругвай дарвозасига киритган тўпи ЖЧнинг энг чиройли голи, деб тан олинганди. Бутун дунёга ўз брендини танита олган футболчи "Реал"дан жиддий таклиф олди ва ҳеч иккиланмай, уни қабул қилди. Мадриддаги илк мавсумини кейинчалик қадрдонига айланган Карло Анчелотти қўл остида ўтказган футболчи яхши натижа қайд этди. Унга катта ишонч тақдим этилган ҳолда, 10-рақам топширилди. Бироқ жамоанинг ўша мавсумдаги ишлари юришмади ва май ойида бош мураббийга чиқиш эшиклари кўрсатилди. Шу тариқа, Хамеснинг ҳам ўйинида пасайиш кузатилди. Жамоа бошқарувига келган Бенитес ва Зидан унинг хизматига жиддий эҳтиёж сезмади ва 75 млн евролик юлдуз захира ўриндиғига тобора мустаҳкам жойлаша бошлади. Бу орада "Карло ота" Баварияга мураббий этиб тайинланди ва ишни собиқ шогирдини Мюнхенга олиб келишдан бошлади. Хамес 2 мавсумни "қизиллар" таркибида ўтказиб, ортга қайтганида, уни яна Зидан кутиб олди. Бироқ франциялик мутахассис унга имконият беришни истамади ва Родригеснинг формаси кундан кунга пастлай бошлади. Яна бир йил вақтини "Реал"да беҳуда ўтказган қаҳрамонимизни эски қадрдони Англияга чорлади. У ҳозир Карло Анчелотти қўл остида "Эвертон" либосида тўп тепмоқда ва ҳеч иккиланишсиз айта оламизки, Хамес Родригес жуда хурсанд!

james rodriges_1

Эдер Милитао

Кетма-кет учинчи бор Чемпионлар Лигаси бош совринини боши узра баланд кўтарган Зинедин Зидан ва жамоа президенти Флорентино Перес ўртасида келишмовчилик юзага келди. Оқибатда, франциялик мутахассис ўз вазифасидан озод этилди. Бу мутлақо хато қарор эканлигини бироз кеч англаган Перес Зиданни ортга қайтаришни мақсад қилди ва таклиф юборди. "Ковушим кўчада қолган эмас" қабилида иш кўрган мураббий шартнома олдидан катта маблағ талаб қилди. "Қироллик клуби"ни тахтга қайтариш учун барча нарсага тайёр бўлган Перес ёзги трансфер бозорида рекорд миқдорда харажат қилди. 2018/19 йилда "Реал" либосини кийган футболчилардан бири Эдер Милитао эди.

Узоқ йиллар мобайнида мадридликлар ҳимоясида мустаҳкам қўрғон қура олган Рамос ўринбосари сифатида кўрилган Милитао 50 млн евро эвазига "қаймоқранглилар" сафига келиб қўшилди. Энг қизиғи, Серхионинг ўрнига у майдонга тушса, "Реал" ҳимояси болаларча хатога йўл қўймоқда. Аксинча, Рамос бошланғич таркибдаги ўрнини унга бермаса, бразилиялик ҳимоячининг истеъдоди кундан кунга сўниб боряпти. Бир ярим мавсум мобайнида 26 та ўйинда майдонга тушган футболчидан мухлисларнинг тобора умиди йўқолиб бормоқда. Сўнгги кунларда Рамоснинг жароҳат олганлиги туфайли ўзини кўрсатиш имкониятига эга бўлган 23 ёшли ҳимоячи отни қамчилаши шарт. Акс ҳолда, қўл остидаги футболчиларга доим ҳам имконият беравермайдиган Перес уни бирорта даъвогарга сотиб юбориши ҳеч гап эмас.

militao_1

Лука Йович

Зидан "Реал"га қайтганидан кейин амалга оширилган энг ёмон иккита трансфердан бирига етиб келдик. "Айнтрахт"даги омадли мавсумидан кейин Европа грандлари назарига тушган сербиялик футболчи Мадридга кўчиб ўтди. Ўша пайтда ҳали жаҳон футболида ўзини тўлиқ намойиш этиб улгурмаган Йович учун 63 млн евро тўлаган Пересни танқид қилишди. Қизиғи, бу ҳолат ҳамон тўхтагани йўқ. Бир ярим мавсум мобайнида Бенземани соясида қолиб кетган Лука 32 та учрашувда "қаймоқранглилар" шарафини ҳимоя қилди. Бу кўрсаткичга тўлиқроқ назар солсак, қаҳрамонимиз аксарият беллашувларда захирадан ўйинга қўшилганини билиш мумкин. 23 ёшли ҳужумчи умумий ҳисобда 955 дақиқа майдонда ҳаракат қилган. Бу ҳар бир учрашув учун ўртача 30 дақиқага тўғри келади. Шунга яраша фойдали ҳаракатлар сони ҳам кўп эмас: 1,5 йил ва 2 тадан гол ва ассист. Қўшимчасига, ўзининг хурмача қилиқлари билан ҳам кўзга ташланган футболчи раҳбариятга муаммолар туғдира бошлади. Бу ҳолат Йовичнинг ижара асосида "Айнтрахт"га юборилишига сабаб бўлди. Шунча пайт давомида "Реал" либосида 2 та гол урган Лука жонажон клубидаги илк ўйинидаёқ дубль муаллифига айланди. Қизиғи, бунинг учун у атиги 28 дақиқа вақт сарфлади, холос.

jovich_1

Эден Азар

Навбат омадсизларнинг "каттаси"га етиб келди. Зиданнинг энг катта хатосига айланган трансфер айнан Азар номи билан боғлиқ. "Қироллик клуби"да Криштиану Роналдунинг ўрни шу қадар катта эканки, ундан кейин ҳосил бўлган бўшлиқни на катта трансфер, на ёш истеъдодлар билан тўлдириб бўлади. Ўзининг сўнгги мавсумида "Челси"нинг Европа Лигасида зафар қучишида беназир роль ўйнаган Эден Мадридга келиши биланоқ, чўққидан жарликка қулади. Кетма-кет жароҳат олган бельгиялик вингер ўз формасини буткул йўқотиб қўйди. Испан ОАВнинг маълум қилишича, Азар шу қадар чуқур руҳий тушкунликка тушиб қолганки, ҳатто машғулотларда ҳам тер тўкиб шуғулланмай қўйган. У жароҳат олмаслик учун яккакурашларга киришдан қаттиқ қўрқиб қолганлиги айтилмоқда. Бироқ Зидан унда қандайдир жиҳат кўрмоқда чоғи, соғайган вақтидан бошлаб, кейинги жароҳатигача унга ишонмоқда. 30 ёшли футболчи 1,5 йилда атиги 35 та ўйинда иштирок этди. У билан бир вақтда жамоага келган Йович, Милитао каби футболчилардан унинг фарқи шундаки, Азар учун асосий таркибдаги ўрин кафолатланган. Шундай бўлса-да, 35 та ўйин трансфер нархи 160 млн атрофида бўлган футболчи учун жуда паст кўрсаткич(маълум бўлишича, "Реал" Азар учун "Челси"га умумий ҳисобда 160 млн атрофида маблағ тўлаб бериши лозим). Бугунги кунга келиб қаҳрамонимизнинг "Transfermarkt"даги нархи 50 млн еврогача пастлади. Ортда қолган вақт давомида у ўз ҳисобига 4 гол ва 7 ассистни ёздириб қўйганлигининг ўзи ҳам бугунги Эден Азарнинг ҳақиқатан синганига далил бўла олади.

azar zidan.

Жавоҳир Азимов тайёрлади

Матнда хатолик топсангиз, ўша хатони белгилаб, бизга жўнатинг (Ctrl + Enter)