Камавинга ва Беллингем тўлиқ машғулотларга қачон қайтади?

"Реал Мадрид" ярим ҳимоячиси Жуд Беллингем жароҳатдан тикланиш жараёнини тезлаштиришни хоҳламоқда. 

Ёдга солиб ўтамиз, у июль ойида елкасидан операция қилдирган эди ва шифокорлар унинг сафга қайтиши учун 10–12 ҳафта вақт кераклигини айтган. "The Athletic"нинг ёзишича, инглиз футболчиси бу ҳафта жамоа билан қисман машғулот ўтказди ва шу ойнинг ўзида майдонга қайтишни умид қилмоқда. Бироқ, клуб октябргача кутиш тарафдори.

Шунингдек, Эдуардо Камавинганинг ҳам тикланиши кутилгандан секин кечмоқда. Француз хавбеки августда тўпиқдан жароҳат олган ва дастлаб у сентябрь терма жамоалар ўйинларидан сўнг сафга қайтади деб режалаштирилганди. Лекин ҳалигача у жамоавий тўлиқ машғулотда қатнашмади ва 13 сентябр куни "Реал Сосьедад"га қарши баҳсни ўтказиб юборади.

Бундан ташқари, ушбу учрашувда Эндрик ва Ферлан Менди ҳам майдонга туша олмайди.