Катанец жамоасининг бу натижаси аввал ҳам икки бор такрорланган

Ўртоқлик учрашувида Камерунни мағлуб этган Ўзбекистон миллий терма жамоаси сўнгги 4 та ўйинда гол ўтказиб юбормагани ҳақида ёзгандик.

Ўзбекистонлик машҳур футбол мутахассиси Алишер Никимбаев "Телеграм"даги канали орқали бу ҳолат аввал ҳам икки бор такрорлангани ҳақида ёзди. 

Яъни, вакилларимиз 2004 йилда кетма-кет Фаластин (3:0), Ироқ (1:0), Саудия Арабистони (1:0) ҳамда Туркманистонга (1:0) қарши беллашувларда дарвозамиз дахлсизлигини сақлаб қолган. Барча баҳслар расмий мақомда бўлган ва жамоамиз Равшан Ҳайдаров бошчилигида ҳаракат қилган.

Шунингдек, 2006-2007 йиллар оралиғида ҳам Гонконг (0:0), Бангладеш (4:0), Қатар (2:0) ва Озарбайжон (0:0) билан ўйинларда гол ўтказиб юбормаганмиз. Бу сафарги сериянинг дастлабки 3 қарама-қаршилиги Осиё Кубоги саралашида ўтказилган ҳамда Валерий Непомняший қўл остида ўйнаган. Озарбайжонга қарши беллашув ўртоқлик мақомида бўлиб, жамоамизни Рауф Инилеев бошқарган.