Kazemiro "Manchester Yunayted" bilan xayrlashdi

"Manchester Yunayted" yarim himoyachisi Kazemiro klub bilan xayrlashuviga bag‘ishlangan ta’sirli post qoldirdi.

Braziliyalik futbolchi yakshanba kuni "Old Trafford"dagi so‘nggi o‘yini o‘tkazdi. Uchrashuvda "qizil iblislar" "Nottingem Forest"ni 3:2 hisobida mag‘lub etdi.

O‘yindan so‘ng Kazemiro muxlislar bilan xayrlashdi va keyinchalik ijtimoiy tarmoqlarda maxsus murojaat e’lon qildi.

"Hayotda insonning bir qismiga aylanib qoladigan joylar bo‘ladi. Manchester men uchun doimo uy bo‘lib qoladi.

Butun shahar, klubga va har bir muxlisga chin dildan minnatdorchilik bildiraman. Bu to‘rt yil men va oilam uchun unutilmas bo‘ldi.

Biz his qilgan baxt va mehrni so‘z bilan ifodalash qiyin. Xotiralar va qo‘llab-quvvatlov uchun rahmat. Men abadiy "qizil iblis" bo‘lib qolaman", — deb yozdi 34 yoshli futbolchi.

Ma’lumot uchun, Kazemiro mavsum yakunida erkin agentga aylanadi.