Кетишими керак! Анчелотти "Реал Мадрид"ни тарк этади

Карло Анчелотти мавсум якунидан сўнг фаолиятини "Реал Мадрид"да давом эттирмасликка қарор қилди. Бу ҳақда "Radioestadio Noche" хабар берди.

Мураббий амалдаги шартномаси 2026 йилга қадар бўлишига қарамай, барчаси фақат унга боғлиқ эмаслигини билади. Мавсум унвонлар билан якунланса ва клуб унинг шартномада кўрсатилган муддатда жамоада қолишини талаб қилса ҳам, у ёзда "Реал"даги фаолиятини якунламоқчи.

Келгуси мавсумда "Қироллик клуби"даги бош мураббий лавозимига асосий номзод - "Байер"нинг ҳозирги мураббийи Хаби Алонсо ҳисобланади. Унинг яқинлари буни оддий воқеа деб билишмайди ва футболда ҳамма нарса бўлиши мумкинлигига ишонмоқда.

Маълумот учун, Анчелотти клуб тарихидаги энг муваффақиятли мураббий ҳисобланади. Жамоа унинг қўл остида 2 та Ла Лига, 2 та Чемпионлар Лигаси, 1 та Қироллик Кубоги, Европа ва Испания Суперкубоги, Клублар ўртасидаги Жаҳон чемпионати кубоги каби совринларни қўлга киритган.