Kilian Mbappe va PSJ o‘rtasidagi moliyaviy mojaro davom etmoqda

Kilian Mbappe 2024 yilda Madrid jamoasiga erkin futbolchi sifatida o‘tganidan keyin, u bilan Parij jamoasi o‘rtasidagi pul masalalari bo‘yicha tortishuv hali ham hal bo‘lgani yo‘q.

Ma’lumki, Mbappe Parij jamoasiga nisbatan nafaqat moliyaviy talablar qo‘ygan, balki 2023 yilda uni yangi shartnoma imzolashga majburlaganini va ruhiy bosim o‘tkazganini ta’kidlab, rasman shikoyat ham kiritgan. O‘sha vaqtda u asosiy jamoa bilan mashg‘ulotlardan vaqtincha chetlatilgan edi.

Bugungi sud majlisida Mbappe jamoadan 240 million evro miqdorida to‘lov talab qilayotgani ma’lum bo‘ldi.

Futbolchi taqdim etgan talablar quyidagilardan iborat:

12,6 million evro — oldindan ogohlantirish uchun kompensatsiya;

25 million evro — ishdan bo‘shatilish yuzasidan qonuniy to‘lov;

3,6 million evro — ta’til puli;

1 million evro — uch oylik maosh kechiktirilgani uchun qo‘shimcha ta’til puli;

44 million evro — nohaq chetlatilgani uchun to‘lov;

17 million evro — 2023 yil aprel – iyun oylari uchun to‘lanmagan maosh;

36,6 million evro — imzolash vaqtida belgilangan bonusning qolgan qismi;

1 million evro — odob-axloq uchun beriladigan mukofot;

37 million evro — shartnomada belgilanmagan qo‘shimcha ish uchun;

37 million evro — ruhiy bosim o‘tkazilgani uchun to‘lov;

18 million evro — mehnat shartlari buzilgani uchun to‘lov;

18 million evro — xavfsizlik qoidalari buzilgani uchun to‘lov.

Mbappening vakili suddan uning oylik maoshi miqdorini 14,8 million evro deb hisoblashni so‘ragan.