Клоппни йиғлатиб, Тухелни мураккаб аҳволда қолдирган йигитлар! Африка кубогида иштирок этадиган 10 та юлдуз!

Бугун Камерунда Африка Миллатлар Кубоги старт олди. Мусобақада дунё футболининг юлдузлари иштирок этмоқда. Sports.uz турнирдаги энг кучли футболчилардан тузилган Топ-10ни эътиборингизга ҳавола этади.

10-ўрин. Муҳаммад Бенрахма (Жазоир)

Бенрахма 2015 йилда термада дебют қилган, аммо ўтган йили асосий футболчига айланди. 2021 йил Муҳаммадга омадли келди. "Вест Хэм" билан шартнома имзолади ва асосий таркиб футболчисига айланди. Жорий мавсумда 8 гол ва 4 ассистни ўз ҳисобига ёздириб қўйган ярим ҳимоячи Дэвид Мойеснинг марказдаги асосий кучига айланиб бормоқда.

9-ўрин. Франк Кессье (Кот-д'Ивуар)

"Фил суяги юрти" юлдузларга тўла бўлса ҳам, катта мусобақаларда жуда омадсиз иштирок этади. Фақат 2015 йилга келибгина улар турнирда Ганани пенальтилар сериясида мағлуб этиб, яна Африка тожини кийишга муваффақ бўлди. Ҳозир "филлар"нинг таркиби кучли, аммо деярли барча таниқли футболчилар ҳужум чизиғига жавоб беради. Франк эса, ортга кўпроқ қайтган ҳолда, жамоасига ёрдам беришга уриниб кўради. Унинг "Милан" билан шартномаси йил охирида поёнига етишини ҳисобга олсак, бу турнирда ўзини янада яхшироқ кўрсатишга уриниши аниқ.

8-ўрин. Наби Кейта (Гвинея)

"Қора қитъа"даги мусобақадан энг кўп жабр чеккан Юрген Клопп десак, адашмаган бўламиз. У ўз ҳужумчилари билан биргаликда, майдон марказидаги "жокер"ини ҳам Африкага жўнатиб юборди. Гвинеяда Наби Президентдан-да машҳурроқ шахс. Барча уни мамлакат жамоасини "елкасида" олиб юришини кутмоқда. Кейта бу вазифани қандай уддалайди? Воқеалар ривожини кузатишда давом этинг!

7-ўрин. Калиду Кулибали (Сенегал)

Ҳозир "шерлар" мусобақада ғолиб чиқиш учун энг асосий даъвогардан бири бўлиб турибди. Бошқаларникидан фарқли ўлароқ, барча позицияларда кучли футболчилар жамланган. Мудофаа эса "Наполи" аъзоси Калиду Кулибалига суянади. Жисмонан бақувват ҳимоячи бир неча йиллардан бери суперклублар эътибор марказида, бироқ Неаполдан кетгани йўқ. 2019 йилда у Жазоирга қарши финал учрашувини ўтказиб юборган ва жамоаси 0:1 ҳисобида мағлубиятга учраган эди. Бу сафар у Камерунга Сенегалнинг сардори сифатида ташриф буюрди ва ортга фақат олтин медаллар билан қайтмоқчи.

6-ўрин. Ашраф Ҳакими (Марокаш)

"Реал" тарбияланувчиси бўлишига қарамай, уни "Боруссия" Дортмунд кашф этди. Кейин "Интер" билан Италия чемпионлигини қўлга киритди. Ҳозирда Месси, Неймар ва Мбаппе сингари топ даражадаги футболчилар билан бирга тўп сурмоқда. Шу ўринда қизиқ факт! Марокаш Ҳакими асосий таркибда тушган сўнгги 15 ўйиннинг бирортасида мағлубиятга учрамади. 13 ғалаба ва икки дуранг!

5-ўрин. Рияд Маҳрез (Жазоир)

Уч карра АПЛ чемпионлигини қўлга киритган вингер 2019 йилда сардор сифатида Жазоирни финалга бошлаб тушган ва совринни ҳам айнан у биринчи бўлиб қўлида баланд кўтарган эди. Пеп Гвардиола қадрлайдиган футболчи "Сити"да ҳам анча катта натижаларга эришмоқда. 167 ўйинда 52 гол ва 42 ассист! "Саҳро тулкилари" старт олган мусобақада ғалаба қозониш учун бу мавсум ҳам асосий даъвогарлардан бири!

4-ўрин. Эдуар Менди (Сенегал)

Бу рўйхатда дарвозабонни кўришни тахмин қилганмидингиз? Қандай қилиб "Челси"ни ЕЧЛ олтин медаллари сари етаклаган Мендини "Toп-10"га киритмаслик мумкин? Эдуар ФИФА томонидан ҳар мавсум топшириладиган "йилнинг энг яхши дарвозабони" совринига асосий даъвогар бўлиб турибди! Африка Миллатлар Кубогида дунёнинг энг кучли посбони иштирок этиши интригани янада ошириши аниқ.

3 ўрин. Себастьен Алле (Кот-д'Ивуар)

Ҳужумчи ортга қолган 2021 йилда дунёнинг энг сермаҳсул футболчилари рўйхатининг кучли ўнлигидан ўрин эгаллади. "Аякс" ва терма жамоа сафида 12 ой ичида 37 бор рақиб дарвозасини ишғол қилган "Аякс" ҳужумчиси ЕЧЛда ҳам жим тургани йўқ. 6 ўйинда 10 бор гол киритиб, плей-офф ўйинлари олдидан Европанинг энг яхши страйкерларидан бирига айланиб олди.

2 ўрин. Садио Мане (Сенегал)

Мане 2019 йилдаги мусобақада терма жамоаси билан финалга етиб борган, аммо аламли мағлубиятни қабул қилиб олган эди. Бу сафар "Ливерпуль" форварди ишга анча жиддий киришган кўринади. У Сенегал сафидаги сўнгги 11 ўйинда 7 гол киритиб, мусобақага аъло даражадаги кайфиятда ташриф буюрмоқда.

1-ўрин. Муҳаммад Салоҳ (Миср)

Мане сингари Салоҳ ҳам ортиқча таърифга ҳожат бўлмаган футболчилар сирасига киради. Муҳаммад сўнгги йилларда дунёнинг энг яхши футболчиларидан бирига айланди. Ҳозир эса футбол оламидаги энг кучли лига - АПЛнинг энг яхши футболчиси! 20 ўйинда гол+пас тизимида 25 очко жамғарган мисрлик Жейми Вардининг рекордини янгилашга муваффақ бўлди. Миср "қора қитъа" биринчилигидаги ғалабалар сони бўйича рекорд ўрнатган. Шу кунга қадар бирорта Африка футбол жамоаси Миср сингари кубокни 7 бор ўзиники қилиб олишни уддалай олмаган. Сўнгги бор, 2010 йилда Миср Африка тахтига кўтарилган. Қарийб 12 йиллик танаффусдан сўнг, Муҳаммад Салоҳ бошчилигидаги Миср 8 соврин сари ҳаракатни бошлади.

Я . У