Колумбияликлар Ўзбекистон терма жамоаси ҳақида қандай фикрда?

АҚШ, Канада ва Мексика давлатлари мезбонлик қиладиган Жаҳон чемпионатига қуръа ташланди. Ўз тарихида илк бор мундиалда иштирок этадиган Ўзбекистон "K" гуруҳидан жой олиб, Колумбия ва Португалия билан баҳс олиб боради. Тўртинчи жамоа эса саралаш босқичидан сўнг маълум бўлади. Машҳур "Casablanca Sports" нашрининг колумбиялик журналистлари ўз терма жамоасининг гуруҳдаги рақиблари ҳақида қуйидагича фикр билдирди.

"Қуръа натижалари маълум бўлгандан кейин барча рақибларимизни кўриб чиқдик. Энг катта эътиборни, албатта, Португалия билан бир гуруҳдан жой олганимиз тортди. Қизиқ томони шундаки, Португалия билан биз ҳозирга қадар бирор марта ҳам ўзаро тўқнаш келмаганмиз.

Аммо кўпчилик қизиққан яна бир рақиб бор — бу Ўзбекистон. Уларнинг бош мураббийи Фабио Каннаваро 3-4-2-1 тактикасига жуда маҳорат билан ёндашади ва динамик ўйин услуби билан ажралиб туради. Бу тизим уларга Осиёда катта натижалар берган. Улар узоқ ва биз учун унчалик таниш бўлмаган мамлакат бўлиши мумкин, лекин футболи шиддат билан ривожланмоқда. "Оқ бўрилар"ни Осиёнинг энг кучли терма жамоаларидан бири дейиш хато бўлмайди", — деди журналистлар.

Маълумот учун, мундиал 2026 йилнинг 11 июнида старт олади.