Коутиньо расман "Сантос" футболчисига айланди

Машҳур бразилиялик ярим ҳимоячи Филиппе Коутиньо расман "Сантос" футболчисига айланди. 34 ёшли футболчи Сан-Паулу штати клуби билан 2026 йил охиригача мўлжалланган меҳнат шартномасини имзолади. Эътиборлиси, тажрибали хавбек янги жамоасига мутлақо текин равишда ўтди — "Васко да Гама" билан шартномаси тугаганидан сўнг у эркин агент мақомига эга эди.

Қизиғи шундаки, "Сантос" сафида Коутиньо яна бир бор Бразилия терма жамоасидаги кўп йиллик шериги — ҳужумчи Неймар билан бир жамоада ўйнайди. Неймар ҳам ҳозирда шу клуб шарафини ҳимоя қилмоқда.

Эслатиб ўтамиз, Филиппе Коутиньо Европадаги энг ёрқин даврини Англиянинг "Ливерпуль" ва Испаниянинг "Барселона" жамоалари таркибида ўтказган. Узоқ йиллик фаолияти давомида маҳоратли ярим ҳимоячи шунингдек Миланнинг "Интер", Мюнхеннинг "Бавария" ва Бирмингемнинг "Астон Вилла" каби етакчи клубларда ҳам тўп суришга улгурган.