Кумиковни

Бош мураббийсиз қолган “Андижон”ни ким бошқариши охирги пайтда кўндаланг савол сифатида қўйилаётганди. Хабарингиз бор, “Бургутлар” чемпионатнинг дастлабки иккита турида ютқазиб, бир бор дуранг ўйнаганидан сўнг бош мураббий ролида ишлаб келган Александр Хомяков ўз хоҳишига кўра истеъфога чиққанди. 

Бу орада “Андижон”ни ёш, иқтидорли мураббий Диёр Мирзабоев вақтинча бошқариб туриши айтилганди. Бироқ клуб раҳбарлари барибир ушбу лавозимга кўпни кўрган, маҳоратли мураббийни тайинлаш борасида изланди. Якунда бу масала ечими топилди.

Қизиғи, клубдан кетган россиялик мураббий ўрни бошқа бир россиялик мутахассис билан тўлдирилди. Кумиковни мухлислар яхши билади. Унинг юртимиздаги охирги бошқарган жамоаси АГМК эди. Сўнгра, Қозоғистон чемпионатида ишлади. Энди Виктор Балютович бор эътиборини “Андижон”га қаратади.

Бундай даражадаги мураббийни кўндириш ҳам осон кечмагандир. Қолаверса, унинг айнан “Андижон”ни бошқаришини балки кўпчилик кутмаган бўлиши ҳам мумкин. Биз мазкур мураббий билан боғлиқ воқеалар ривожи қандай тус олгани, қай тариқа келишувга эришгани каби мухлисларни қизиқтирган масалалар бўйича “Андижон” клубининг вице-президенти Маъруф Абдусаломов билан суҳбатлашдик.

- Куннинг муҳим хабарларидан бири сифатида Виктор Кумиковнинг “Андижон”га бош мураббий этиб тайинланганини айтиш мумкин. Ушбу мутахассисни танлашингизга асосий сабаб нима?

- Ҳаммамизга яхши аёнки, Виктор Балютович ишлаган жамоаларида ижобий натижаларга эришган. Академияларнинг иш самарадорлигини ҳам оширишга катта ҳисса қўшган. Қозоғистонда “Шахтёр” клуби билан қандай муваффақиятларга эришганини ҳам яхши биламиз. Бундан ташқари, Кумиков ўша пайтларда Қозоғистон терма жамоаси бош мураббийига ҳам ўз маслаҳатлари билан ёрдам берган. Кумиковнинг иш услубида унинг плюс томонлари катта, ҳали минус тарафларини кўрмадим. Яна бир муҳим жиҳатлардан бири шундаки, Кумиковни олдинги мураббийимиз Александр Хомяковнинг устози, деб биламан. Чунки Виктор Балютович бўлмаганида у “Машъал”га келмаган бўларди. Ўша кезларда Хомяковни дарвозабонлар мураббийи сифатида таклиф қилганди.

абдусаломов

- Виктор Балютович билан музокаралар қандай кечди? Кўпчилик уни нархи қиммат мураббий, деб ҳам ҳисоблайди. Шундай экан, у билан келишиш қийин кечмадими?

- Биласизми, мураббий билан учрашганимизда, жамоага ёрдам бермоқчиман, “Андижон”нинг мухлислари менга ёқади, деган фикрларни билдирди. Шунингдек, у ҳар қандай ўйинда ҳам жамоани минглаб ишқибозлар қўллаб-қувватлайди, улар асло “Андижон”ни ёлғиз қолдирмайди, мени биринчи навбатда шу нарса ўзига тортди, деган гапларни ҳам айтди. Албатта, у билан музокаралар жараёнида клубнинг ҳозирги молиявий ҳолати ҳақида ҳам гаплашдик. Кумиков биринчи навбатда натижа кўрсатайлик, шундан кейин пул ўз-ўзидан келаверади, деди. Шу билан бирга биздан аниқ сумма талаб қилгани ҳам йўқ. Умуман олганда, музокаралар давомида у билан фикримиз бир жойдан чиқди. У бизнинг таклифимизга кўнди. Ўйлайманки, бу ёмон танлов эмас.

- Учта турдан кейин Хомяковнинг “Андижон”дан кетиши кутилмаган ҳолат бўлганди. Айтинг-чи, унинг жамоада олиб борган ишига қандай баҳо берасиз ва клубдан кетганига муносабатингиз қандай?

- Унинг иш услуби менга ёққанди. Йўқдан бор қиладиган мураббий эди. Хомяковнинг ишига эътироз йўқ. Аммо, бу футбол. Бугун бу ерда бўлса, эртага “Навбаҳор”да, кейин “Пахтакор”да бўлиши мумкин. Ҳаёт эса давом этаверади. Мураббий кетиб қолса, Андижонда футбол тўхтаб қолади, дегани эмас. Биз ҳозир ҳам Александр Андреевич билан гаплашиб турамиз. Ўртамизда илиқ муносабатлар сақланиб қолган. У ҳозирча навбатдаги танловини амалга оширгани йўқ. Агар қайсидир клубни бошқарадиган бўлса, бу борада унга омад тилайман. Кетган мураббийнинг ўрнига муносиб номзодни танладик. Хомяков Андижондан пул учун кетгани йўқ. Шунчаки, иш жойини ўзгартирмоқчи бўлди холос.

абдусаломов3

- Кумиковнинг мураббийлар штаби қандай кўринишда бўлади?

- Диёр Мирзабоев Кумиковнинг ёнида бўлади, бу шубҳасиз. Ўзим ҳам ёш мутахассисимиз – Мирзабоевга ишонаман. Унинг тажрибали мураббий олдида янада малакаси ошишини истайман. Кумиков бир йиллик мураббий эмас. Худо хоҳласа, у билан камида икки йил давомида бирга ишлаймиз. Албатта, шартномада 2021 йилни қайта кўриб чиқиш шарти билан келишувга эришганмиз.

- Янги мураббий Андижонда қачондан иш бошлайди?

- Футболимиз раҳбарларидан қачон рухсат бўлса, шунда иш бошланади. Ҳозир карантиндамиз. ПФЛ томонидан машғулотлар ўтказилишига рухсат бўлганидан сўнг Кумиков клубда иш бошлайди. Айни пайтда клуб базасида капитал таъмирлаш ишлари олиб борилмоқда. У ердаги шароитларни янада яхшилаяпмиз.

 

Матнда хатолик топсангиз, ўша хатони белгилаб, бизга жўнатинг (Ctrl + Enter)

Фикрлар

Фикр қолдириш учун авторизациядан ўтинг!
Murod Panjiev
12/05/2020 10:53
Кумиков хам Андижонда кўп қолмайди айтган пулини беролмайди Андижон клуби пул йўқ жойда ким хам ишлардим,нима бўлгандаям омад Андижонга
Шермухаммад Абдурахмонов
12/05/2020 12:21
Сен каердан биласан Андижонда пул бор йуклигини узини чунтагинда 30-минг пулин йук булса кераг узи
Murod Panjiev
22/05/2020 22:42
Андижон жамоанг қашоқ бўлиб қолдику кўчага чиқиб тиланчилик қилсин бу йил суперлигага қолса хурсанд бўл