Кураш. Бугун Президент соврини учун турнирнинг очилиш маросими бўлиб ўтди (+интервью)

Ўзбек кураши бўйича Президент соврини учун халқаро мусобақа бошланди. Термиз шаҳри мезбонлик қилаётган мазкур нуфузли турнирда 30 га яқин давлатдан спортчилар иштирок этмоқда. Бугун очилиш маросими бўлиб ўтди ва унда Халқаро кураш ассоцияцияси президенти Ҳайдар Фармон, Ўзбекистон Республикаси Туризм ва спорт вазири Азиз Абдуҳакимов ҳамда Сурхондарё вилояти ҳокими Тўра Боболов иштирок этди.

Сўзга чиққан ҳар бир мутасадди ўз нутқи давомида спортчиларга омад ва зафарлар ёр бўлишини тилади ва бутун мусобақа бутунлай ҳалол ўтишига ваъда берди. Боиси, Ўзбек курашининг асосий принципи ҳам айнан ҳалоллик, дея таъкидланди очилиш маросимида. Шундан сўнг, турли ҳил мамлакатлардан келган курашчилар гиламга чиқа бошлади.

Биз эса Ўзбекистон кураш федерацияси вице-президенти, замонавий кураш қоидалари асосчиси Комил Юсупов билан суҳбат уюштирдик:

“Ушбу турнир илк маротаба 1993 йилда ўтказилган. Ўша вақтдан бери Сурхон воҳаси мазкур мусобақани ёритишда яқиндан ёрдам бериб келмоқда. Биз уларнинг ташкилотчилик ишларини ҳурмат қиламиз. Турнирнинг аҳамияти жиҳати шундаки, у миллий спорт туримизнинг жаҳон миқёсига чиқиши йўлида катта ёрдам беради.

Бу сафарги мусобақанинг яна бир устунлик томони пандемия шароитида аксарият давлатлар ўзларида катта турнирларни қабул қила олмаяпти. Биз эса катта жасорат билан 30 га яқин мамлакатдан спортчиларни таклиф этганмиз. Бу ҳолат бизга катта ғурур беради.

Мана шундай саъй-ҳаракатларимиз билан курашимизни Осиё ўйинларига киришига эришдик. Умуман олганда, Осиё биринчилиги ҳам кичкина турнир эмас. 4 йилликнинг нуфузли мусобақасидан кейин қитъа чемпионатлари энг катта мусобақа саналади. Шунга қармай, тўхташ ниятимиз йўқ ва Ўзбек миллий курашини Олимпия ўйинларига киритиш учун ҳаракат қилишдан чарчамаймиз”.