Кутманглар, бу футболчини сотмаймиз...

“Ньюкасл”да тўпурарлик маҳоратини намойиш қилиб келаётган Александер Исаак Европанинг бир неча гранд клублари нишонида турибди.

Жорий мавсумда “қарғалар” сафида 39 та учрашувда 26 та гол ва олтита ассист қайд этганидан кейин швециялик ҳужумчининг харидорлари кўпайиб кетди.

Хусусан, Англия Премьер-лигасининг янги чемпиони “Ливерпуль” ва иккинчи ўринни эгаллашга яқин турган “АРсенал” ёзда 25 ёшли тўпурарни ўз сафига қўшиб олмоқчи.

Шунга қарамай, “Ньюкасл” раҳбарияти жамоа ўйинига таъсири катта бўлган ва натижа кўрсатиб келаётган юлдузи бўйича таклифларни кўриб чиқмаслигини маълум қилди.

Клуб хўжайини Ёсир Ар-Румайён мутасаддиларига Исаак бўйича ҳеч бир таклифни қабул қилмасликни буюрди. “Ньюкасл” жорий мавсум тугаши билан ўйинчининг агентларини музокарага таклиф қилади ва янги шартнома бўйича келишув бўлади.