Ла Лиганинг энг зўр дарвозабони жамоани тарк этмоқчи

Испания Ла Лигасида барқарор ва ишончли ўйинлари билан эътибор қозонган словениялик дарвозабон Ян Облак ёзги трансферлар ойнаси даврида “Атлетико Мадрид”ни тарк этиш имкониятини кўриб чиқмоқда.

Marca нашри маълумотига кўра, 33 ёшли дарвозабон ўз келажаги ҳақидаги қарорни мустақил қабул қилади ва бу масала тўлиқ унинг ихтиёрида.

Бу ҳолат мадридликлар учун яна бир муҳим йўқотиш бўлиши мумкин. Аввалроқ клуб афсонаси, ҳужумчи Антуан Гризманн жамоани тарк этган эди.

Агар Облак кетишга қарор қилса, “Атлетико” унга тўсқинлик қилмайди. Агар қолишни танласа, клуб уни ўз режаларида муҳим фигура сифатида кўришда давом этади.

Словениялик дарвозабон 2014 йил июль ойида “Атлетико”га ўтган ва шундан буён мадридликлар сафида 538 та расмий учрашувда қатнашган.