Лапорта ФИФАни танқид қилди: "Рафиньянинг жароҳати — бу шармандалик"

"Барселона" президенти Жоан Лапорта ФИФАни халқаро ўйинлар тақвими учун кескин танқид қилди. Бунга вингер Рафиньянинг Францияга қарши ўртоқлик учрашувида олган жароҳати сабаб бўлди. Бразилиялик футболчи тахминан 5 ҳафта майдондан четда қолади.

"Рафиньянинг жароҳати — бу шармандалик. ФИФА катта клубларда ўйнайдиган футболчилар манфаатини инобатга олган ҳолда тақвим тузиши керак. Бу оддий ўртоқлик ўйини эди ва жамоамизнинг энг яхши футболчиларидан бири жароҳат олди. Албатта, бу жаҳлимизни чиқаради.

Футболчиларни айблаб бўлмайди. Улар профессионал ва ўз мамлакати учун бор кучини беради. Муаммо жуда зич тақвимда, айниқса мавсумнинг ҳал қилувчи палласида. Биз барча совринлар учун курашаётган бир пайтда бу жуда ғазаблантирарли", — деди Лапорта "Mon Esport" нашрига берган интервьюсида.