Лапорта: "Мессининг кетиши тўғри қарор эди"

"Барселона" президенти Жоан Лапорта 2021 йилда Лионель Мессининг клубни тарк этиши ҳақида фикр билдирди.

"Мессининг кетиши — бу мен доим эслаб қоладиган ҳолат. Шу билан бирга, мен учун қувонарлиси шундаки, айнан мен президент бўлган пайтда Лео биринчи жамоада ўйнай бошлаган. У кўп йиллар давомида дунёнинг энг яхши футболчиси бўлиб келди.

Кейин эса мен қарор қабул қилишимга тўғри келди ва ўйлайманки, тўғри қарор қилдим. Натижалар ўзини кўрсатмоқда: биз клуб иқтисодини тикладик, рақобатбардош жамоа туздик ва авлодлар алмашинуви вақти келди. Лео фаолиятининг сўнгги босқичида эди, биз эса янги жамоа қуришимиз керак эди.

Лео билан бирга янги жамоа қуришни истармидим? Албатта. Биз уриниб кўрдик, аммо бу амалга ошмади", — деди Лапорта.

Лионель Месси 2003–2021 йиллар давомида "Барселона"нинг асосий жамоасида тўп сурди. Ушбу давр мобайнида у 778 та ўйинда майдонга тушиб, 672 та гол урди ва 303 та голли узатма амалга оширди.