Legionerimiz braziliyalik to‘purarlar raqobatini enga oladimi?
Qozog‘iston premer-ligasiga start berilib, O‘zbekiston milliy terma jamoasi hujumchisi Igor Sergeev “Aktobe”da debyutini nishonladi.
Qozog‘istonning Vesti.kz sayti mutaxassislari bu yilgi chempionatda premer-liga jamoalari futbolchilari orasida to‘purarlik musobaqasida g‘oliblikka da’vogar qilishi mumkin bo‘lgan o‘yinchilar ro‘yxatini tuzdi. To‘purarlik mahoratini namoyish qila oladigan futbolchilar qatoriga Igor Sergeev ham kiritildi.
Ta’kidlash joizki, nashr mutaxassislari premer-liga to‘purarligi uchun kurash asosan legionerlar, xususan, braziliyalik o‘yinchilar o‘rtasida kechishini taxmin qilmoqda. Ular bilan tanishamiz:
Joao Paulo
32 yoshli braziliyalik hujumchi bu yilgi mavsumda ham ko‘p gol urishga harakat qiladi. “Ordabasi” sharafini himoya qilayotgan Paulo o‘tgan yili 12 ta gol bilan musobaqa to‘purari bo‘lgandi va joriy mavsumda o‘z sovrinini munosib himoya qiladi. Shimkentliklarning hujumchisi 2019 yilda 15 ta gol bilan beshinchi o‘rinni egallagan edi. Paulo mavsumoldi yig‘inlarida oltita uchrashuvda to‘qqizta gol urdi.
Vagner Lav
Rossiyadagi faoliyati va Braziliya terma jamoasidagi o‘yinlari bilan o‘zbekistonlik futbol muxlislariga ham yaxshi tanish bo‘lgan Vagner Lav faoliyatining so‘nggi bosqichini ham legioner sifatida o‘tkazmoqda. U Qozog‘iston tarixidagi eng mashhur jamoa – “Qayrat” uchun to‘p tepyati. O‘tgan mavsum o‘rtalarida jamoaga qo‘shilgan 36 yoshli hujumchi premer-liganing 13 ta uchrashuvida raqiblar darvozasini etti marta aniq nishonga oldi.
Marin Tomasov
Xorvatiyalik hujumkor futbolchi bir necha mavsumdan beri Qozog‘iston chempionatida o‘zini ko‘rsatib kelmoqda. Qo‘shni mamlakatga 2017 yilda kelgan Marin Tomasovning ko‘rsatkichlari yildan-yilga ko‘tarilayotgan edi. Dastlabki uch mavsumda jami 36 ta gol urgan 33 yoshli yarim himoyachi o‘tgan yili koronavirus pandemiyasi tufayli o‘zini ko‘rsata olmadi va atigi 4 ta gol bilan kifoyalandi. Biroq, joriy mavsumda birinchi turdayoq gollar hisobini ochishga muvaffaq bo‘ldi.
Elguja Lobjanidze
Avvalgi ikki mavsum davomida “Taraz” va “Kaysar” tarkibida sakkiztadan gol urgan gruziyalik legioner bu gal kuchliroq klub – “Tobol” hujumchisi sifatida o‘ynaydi. Lobjanidze Qozog‘istonga kelgunicha Rossiya chempionatida “Orenburg” jamoasida 11 ta uchrashuv o‘tkazib, bitta to‘p kiritgan.
Nikolay Kovtalyuk
Qozog‘iston premer ligasiga yangi kelgan ukrainalik hujumchining ham imkoniyatlari yuqori baholanmoqda. “Akjayik” jamoasi bilan shartnoma imzolagan 25 yoshli futbolchi bungacha Gruziya chempionatida to‘purarlik mahoratini namoyish qilgan. Xususan, u Gruziyada 75 ta o‘yinda qatnashib, raqiblar darvozasini 44 marta ishg‘ol etgan.
Igor Sergeev
“Paxtakor”dagi chempionlik mavsumidan so‘ng, erkin agentga aylangan hamyurtimiz bir necha takliflar orasidan “Aktobe”ni tanladi. Qozog‘istonda o‘zbekistonlik legionerga katta umid bog‘lashmoqda.
Qozog‘istonlik jurnalistlar Igr Sergeev “Paxtakor” tarkibida milliy chempionatda 92 ta uchrashuvda 58 ta, Osiyo Chempionlar ligasida 32 ta bellashuvda 12 ta va O‘zbekiston milliy terma jamoasi safida 53 ta o‘yinda 17 ta gol urganiga alohida urg‘u bermoqda.
Fikrlar