Легионеримизнинг голи жамоасини биринчи ўринга олиб чиқди!

Қозоғистон Премьер-лигасида икки нафар ўзбек футболчиси – Бобур Абдухолиқов ҳамда Шаҳбоз Умаров тўп тепаётган Чимкентнинг “Ордабаси” жамоаси жорий чемпионатда чемпионлик учун курашмоқда.

Чимкентликлар 17-турнинг қолдирилган учрашувида Кокшетаунинг “Окжетпес” жамоаси меҳмони бўлди.

Ўйин меҳмонлар устунлигида бошланди. Дастлабки дақиқаларда “Ордабаси” ҳисобни очиши мумкин эди. Бироқ, хорватиялик легионер Бернардо Матичнинг кучли зарбаси дарвоза тўсинига тегди.

“Ордабаси”нинг ғалабасига Бобур Абдухолиқов йўл очиб берди. Учрашувнинг 14-дақиқасида легионеримиз рақиблар қуршовида турганига қарамай, ажойиб усулда зарба йўллаб, ҳисобни очишга муваффақ бўлди.

Ўйиннинг биринчи ярмида Всеволод Садовски “Окжетпес” дарвозасини иккинчи маротаба ишғол қилиб, ҳисобдаги фарқни оширди.

Беллашувнинг иккинчи ярмида меҳмонлар икки маротаба пенальти тепишига тўғри келди. Асхат Тагиберген ва Бауиржон Исломхон 11 метрлик нуқтадан адашмади.

Рақиб майдонидан 4:0 ҳисобидаги ғалаба билан қайтган чимкентликлар мусобақа жадвалида биринчи ўринга кўтарилиб олди.

Чемпионлик йўлидаги асосий рақиб – “Астана” ҳисобида ҳам худди чимкентликлар каби 38 очко бор. Бироқ, пойтахтликлар бир ўйин кўп ўтказган. Агар “Одабаси” захирадаги ўйинида ижобий натижа қайд эса якка пешқадамна айланади.

Бу баҳсда Бобур Абдухолиқов тўлиқ ўйнаган бўлса, иккинчи ҳамюртимиз Шаҳбоз Умаровга мураббийлар штаби ҳордиқ чиқариши учун шароит яратиб берди.

Шаҳбоз бир неча кун олдин Қозоғистон кубоги мусобақасининг ярим финал жавоб учрашувида “Астана”га қарши ўйин қаҳрамони бўлганди. Ҳал қилувчи баҳсда Шаҳбоз гол уриб, жамоасини мағлубиятдан қутқариб қолган эди.

Ғолибни аниқлаш учун қўшимча таймда, чимкентликлар яна гол уриб, ишончли ғалабага эришди ва кетма-кет иккинчи маротаба мамлакат кубогида қатнашадиган бўлди. Шу ўринда, Қозоғистон кубогининг финали 4 ноябрда бўлишини эслатиб ўтамиз.

Финалда “Ордабаси” Кустанайнинг “Тобол” клуби футболчилари билан куч синашади.

Бобур Абдухолиқов Премьер-лигадаги голларини сонини олтитага етказди. Легионеримиз тўпурарлар баҳсида “Каспий” вакили Георгий Панцулая ва “Астана” футболчиси Абат Аймбетов билан учинчи ўринни бўлиши турибди. Бобур кубок ўйинида олтита учрашувда битта гол урганини ҳам эслатиб ўтамиз.

Бу гал чемпионат ўйинида қатнашмаган Шаҳбоз Умаров Премьер-лига ва мамлакат кубоги баҳсларида иккитадан гол ва биттадан ассист қайд этган.

“Ордабаси” футболчилари кейинги учрашувда 17 июль куни сафарда “Атирау” жамоасига қарши ўтказиши белгиланган.

Тўпурар легионеримизга қимматбаҳо рақобатчи келди!

Легионеримизнинг голи финалга йўл очди! Олдинда финал!