Левандовски, “Барса”дан кетавер, биз иш берамиз!

Португалия чемпиони “Порту” клуби раҳбарияти  “Барселона”нинг польшалик ҳужумчиси Роберт Левандовскига жиддий қизиқиш билдирмоқда, деб хабар бермоқда Sky Sports.

Манба маълумотига кўра, португалияликлар машҳур тўпурарга аниқ таклиф беришдан олдин 37 ёшли ҳужумчининг “Барселона”ни тарк этишини кутмоқда. Ҳозирча футболчи Испания жамоасини тарк этиш бўйича якуний қарорини эълон қилмаган.

Апрель ойида каталонияликлар клуби Левандовскига янги бир йиллик шартнома таклиф қилгани хабар қилинган эди, аммо бошқа жамоаларнинг таклифлари молиявий жиҳатдан анча фойдали бўлган. 37 ёшли Левандовскининг “Барселона” билан шартномаси июнь ойида якунланади.

“Порту”дан ташқари, футболчига “Ювентус”, “Милан”, шунингдек Америка МЛС лигаси ва Саудия Арабистонининг бир нечта клублари ҳам жиддий қизиқиш билдирмоқда.

Жорий мавсумда Левандовски клуб сафида барча мусобақаларда 43 та учрашувда қатнашиб, 18 та гол урди ва иккита голли узатмани амалга оширди.