Levandovski faoliyatini qaerda davom ettirishini aytdi

“Barselona”ning eng tajribali hujumchisi Robert Levandovski o‘ziga Saudiya Arabistonidan bo‘layotgan takliflarga munosabat bildirdi.

Bir necha manbalar 36 yoshli polshalik yulduzga “An-Nasr” va “Al-Hilol”dan jiddiy chorlovlar bo‘layotganini ma’lum qilgan edi.

- O‘zimni “Barselona”da, xususan, klub ichida ham, muhlislar orasida ham juda yaxshi his qilyapman.

Men Kataloniyada baxtiyorman va faoliyatimni davom ettirish uchun boshqa joylardan klub qidirayotganim yo‘q, - dedi Robert Levandovski.

Robert Levandovski ilgari Polshada bir necha klublarda to‘p tepgan. Keyinchalik Bundesliganing ikki grandi – “Borussiya Dortmund” va “Bavariya”da faoliyat olib bordi.

“Barselona” mohir to‘purarni 2022 yilning yozida 45 million evro evaziga o‘z safiga qo‘shib olgandi. Levandovskining amaldagi bitimi 2026 yilning yozigacha davom etishi belgilangan.