"Ливерпуль" "Вулверхэмптон" ярим ҳимоячисини сотиб олиши мумкин

"Ливерпуль" раҳбарияти шу ёзги трансфер ойнасида "Вулверхэмптон" ярим ҳимоячиси Жоао Гомесни ўз сафига қўшиб олиш имкониятини кўриб чиқмоқда.

Football Insider нашри хабарига кўра, 25 ёшли бразилиялик футболчи мерсисайд клубининг трансфер рўйхатига киритилган. Маълумотларга қараганда, "қизиллар" аллақачон "Вулверхэмптон" билан Гомеснинг эҳтимолий трансфери бўйича музокараларни бошлаб юборган. Футболчи учун таклиф этилаётган сумма тахминан 35 миллион еврони ташкил этиши мумкин. Шу билан бирга, Жоао Гомесга "Манчестер Юнайтед" ва Мадриднинг "Атлетико" жамоалари ҳам жиддий қизиқиш билдирмоқда.

Эслатиб ўтамиз, ўтган мавсумда Жоао Гомес Англия чемпионатида "Вулверхэмптон" таркибида 35 та ўйинда майдонга тушиб, бир гол урди ва бир голли узатма муаллифига айланди. Ундан аввал футболчи ватанида "Фламенго" клуби шарафини ҳимоя қилган.