“Ливерпуль” билан хайрлашган юлдузга бир кунда иш чиқди

“Ливерпуль” марказий ҳимоячиси Иброҳим Конатенинг клуб билан хайрлашгани эълон қилинганидани бир кун ўтиб, франциялик футболчига янги иш чиқди.

Аслида мерсисайдликлар бу ўйинчини жамоада олиб қолишга бир йилдан ортиқ вақт мобайнида уринган эди. Бироқ мутасаддилари шартномани узайтириш бўйича келишувга эриша олмади.

Журналист Фабрицио Романо маълумотига кўра, 27 ёшли футболчи аллақачон Саудия Арабистонининг номи очиқланмаган бир нечта клубларидан таклиф олди.

Яқин кунларда футболчи ўз олдидаги барча вариантларни кўриб чиқади.

Ўтган йил ноябрь ойида Конатега “Реал Мадрид” ҳам қизиқиш билдирган эди, аммо ҳимоячи “Ливерпуль”га бўлган ҳурмати сабабли музокараларга киришмаган.

Беш йил давомида “қизиллар” сафида Ибраима Конате 183 та ўйинда қатнашиб, ҳимоядаги вазифаларини бажаришдан ташқари, 7 та гол ва 4 та голли узатма қайд этган.