"Ливерпуль" Бундеслигадан ёш иқтидорли ярим ҳимоячи олиб келиши мумкин

Хави Симонс ёзги трансфер ойнасида "Ливерпуль"нинг асосий нишонларидан бири бўлиши мумкин. "CaughtOffside" нашрининг хабарига кўра, мерсесайдликлар "РБ Лейпциг" ярим ҳимоячисини қўлга киритиш учун жиддий ҳаракат қилмоқда. 
 
Нидерландия терма жамоаси аъзоси бўлган Симонс дастлаб 100 миллион еврога баҳоланган эди, лекин ҳозир германияликлар унинг нархини 80 миллион еврога туширган. Бу эса топ-клублар учун уни янада жозибадор вариантга айлантиради. 
 
Манбага кўра, "Лейпциг" футболчини узоқ муддатга сақлаб қолишни режалаштирмаган, шунинг учун бу ёзда уни сотиш имконияти катта. Мерсесайдликлар Симонснинг трансфер ҳолатини ўрганмоқда, шунингдек, "Манчестер Сити" ҳам уни кузатиб бормоқда, деб қўшимча қилинди. 
 
Агар "Ливерпуль" жамоани кучайтириш учун ёш ва истедодли ярим ҳимоячи излаётган бўлса, Хави уларга мос келадиган вариант бўлиши мумкин. 
 
Маълумот ўрнида, 21 ёшли хавбек жорий мавсум 25 та беллашувда иштирок этиб, 8 та гол ва 5 та голли узатмага муаллифлик қилган. Унинг клуб билан амалдаги шартномаси 2027 йилгача мўлжалланган.