"Ливерпуль" Диоманде учун 100 миллион евролик таклиф билан чиққан

"Ливерпуль"нинг Ян Диоманде бўйича таклифи аввал хабар қилинганидек 90+10 миллион евро эмас, балки 80 миллион евро кафолатланган маблағ ва яна 20 миллион евро бонуслардан иборат бўлган.

Бу ҳақда журналист Бен Жейкобс маълум қилди.

Манбага кўра, Диоманде мерсисайдликлар учун асосий трансфер мақсади ҳисобланади. Бироқ агар "Лейпциг" футболчини сотиш бўйича музокараларга тайёр бўлмаса, инглиз клуби бошқа вариантларга эътибор қаратади.

"Ливерпуль" кўриб чиқаётган номзодлар қаторида "Кёльн" вакили Саид Эл Мала, "Брайтон" футболчиси Янкуба Минте ва "Лилль" ҳужумчиси Матиас Фернандес Пардо бор. Шунингдек, клуб раҳбарияти ПСЖ қанот ҳужумчиси Брэдли Барколяни ҳам юқори баҳоламоқда.

Қайд этилишича, "Ливерпуль" Диоманде трансферини узоққа чўзилувчи трансферга айлантирмоқчи эмас. Клуб ҳужум чизиғининг қанотларини тезроқ кучайтиришни мақсад қилган ва музокараларни август ойигача чўзиш режалаштирилмаган.

Маълумотларга кўра, 80 миллион евро ва 20 миллион евро бонусдан иборат дастлабки таклиф дарҳол рад этилган. Ҳозирда "Ливерпуль" "Лейпциг" Кот-д’Ивуар терма жамоаси футболчисининг трансфери бўйича жиддий музокараларга киришишга тайёр ёки тайёр эмаслигини баҳоламоқда.