"Ливерпуль" футболчиси фаолиятини қачон якунлашини айтди

"Ливерпуль" клуби ярим ҳимоячиси Жоржиньо Вейналдум фаолиятини қачон якунлаши ҳақида берилган саволга жавоб берди.

“Келажакда ўзимни Фейеноорд, ПСВ ёки Роттердамнинг “Спарта”сида кўраман. Мен 3 та голланд клубида тўп сурганман ва уларнинг барчасида ажойиб хотиралар қолган, аммо биттасини танлаш керак.

Фаолиятимни бошлаган “Спарта” бу борада энг яхши вариант бўлган бўларди. Аммо, олдиндан ҳеч нарсага кафолат беролмайман.  Масалан, Руд ван Нистелрой ҳам фаолиятини ўз ватанида якунлашга ваъда берган эди. Бироқ, кейинчалик у ўз фикрини ўзгартирди. Умуман олганда эса узоқроқ ўйнашни хоҳлайман. Ҳеч бўлмаганда 38 ёшгача ўйнамоқчиман”, - дейди Вейналдум.

Маълумот учун, 29 ёшли Вейналдум “Ливерпуль” сафида 2016 йилдан буён тўп суриб келмоқда. У ўтган давр мобайнида 174 та ўйинда майдонга тушди ва ўз ҳисобига 17 та гол ҳамда 16 та голли узатма ёздириб қўйишга эришди. Унинг мерсисайдликлар билан амалдаги шартномаси 2021 йилда ниҳоясига етади.