“Ливерпуль”га Муҳаммад Салоҳга идеал ўринбосар топиб беришди

Англия терма жамоасининг собиқ футболчиси Жо Коул “Вест Хэм” сардори Жаррод Боуэн “Ливерпуль” тўпурари Муҳаммад Салоҳ учун идеал ўринбосар бўла олади, деган фикрни ўртага ташлади.

2017 йилдан бери мерсисайдликлар сафида тўпурарлик маҳоратини намойиш қилиб келаётган мисрлик футболчининг “Ливерпуль”даги келажаги  ҳамон жуда ноаниқ бўлиб турибди.

Бир неча манбаларнинг ёзишича, яқинда бош мураббий Арне Слот билан зиддиятга борган Салоҳ ёзда Саудия Арабистони чемпионатига йўл олиши кутилмоқда.

Жо Коул “Ливерпуль” раҳбариятига Салоҳнинг ўрнини тўлдириш учун 29 ёшли Боуэнга эътибор қаратишни маслаҳат бермоқда. Айни пайтда “Вест Хэм” Англия Премьер-лигасидан тушиб кетиши мумкин. Бу ҳолат ўйинчининг трансферини янада осонлаштиради.

- Жаррод — ажойиб футболчи, кучли характерга эга, “Вест Хэм” қаҳрамони. Унинг номи бу клубда ўйнаган барча буюк футболчилар билан бир қаторда туради. У клубни яхши кўради ва фаолиятининг энг юқори чўққисида туриб, совринлар ютиш ва энг юқори даражада курашишга лойиқ.

Агар “Вест Хэм” қуйи лигага тушиб кетса, бунда Жаррод Боуэннинг айби бўлмайди. У клубга сидқидилдан хизмат қилди. Менимча, у кетади ва мухлисларнинг кўпчилиги буни тўғри қабул қилади.

У кимга мос? Албатта, “Ливерпуль”га. Агар Салоҳ кетса, қанотда жой бўшайди. У исталган жойда ўйнай олади, - деди Жо Коул.