"Локомотив"ни Бекободда қийин ўйин кутиб турибди

7 май куни ОЧЛ 5-тур баҳсини Абу Дабида ўтказиб қайтган "Локомотив" навбатдаги учрашувни яна сафарда ўтказади. "Темирйўлчилар" эртага, 12 май куни Бекободда "Металлург" меҳмони бўлишади.

Суперлиганинг 8-туридан ўрин олган ушбу учрашув 19:40да бошланади. Афсуски, жамоа Осиё чемпионлар лигасида гуруҳдан чиқа олмади. Энди бор эътибор ички мусобақаларга қаратилади. Суперлигада иштирок этаётган Андрей Фёдоров шогирдлари олдинда яна бир муҳим баҳс кутиб турибди.

"Металлург" ўз майдонида анча кучли футбол намойиш этадиган жамоалар сирасига киради. Шу томонлама эртанги беллашув анча қизиқ кечиши кутиляпти.

Суперлигада қаторасига бешта ўйинда ғалаба қозонган "Локомотив" ўтган тур кутилмаганда дуранг қайд этди. Жамоа ўз майдонида "Қўқон-1912"ни енга олмади. Энди эса сафарда "Металлург"га қарши баҳс кутиб турибди.