Лука Модрич "Милан" билан шартномасини узайтирди

40 ёшли ярим ҳимоячи Лука Модрич яна бир мавсумга «Милан»да қолишни маъқул кўрди.

Хорватия терма жамоаси сардорларидан бири бўлган футболчининг клуб билан янги шартномаси 2027 йил 30 июнига қадар мўлжалланган.

«Милан» расмий баёнотида шундай дейилади: «Клубимиз катта мамнуният билан Лука Модрич билан янги шартнома имзоланганини эълон қилади. Жамоамизга келган илк кунлариданоқ Модрич «россонери» ярим ҳимоясининг марказий фигурасига айланди. У майдонда ҳам, майдондан ташқарида ҳам ўзининг катта тажрибаси ва юксак маҳоратни намойиш этиб келмоқда, доимий равишда камтарлик ва ишга бўлган катта садоқатини кўрсатмоқда. Жаҳон футболидаги энг кучли ва энг рамзий футболчилардан бири бўлган хорват футболчиси «Милан» сафида ўз фаолиятини давом эттиради. У ўтган мавсумда клуб таркибида 37 ўйин ўтказиб, 2 та гол урди ва жамоа билан бирга янги, муҳим марраларни забт этишга интилмоқда. Лука Модрич «Милан»да 14-рақам остида ўйнашда давом этади», — дейилган Италия клубининг расмий хабарномасида.

Эслатиб ўтамиз, Лука Модрич бир йил аввал «Реал» клубини эркин агент сифатида тарк этиб, «Милан» сафига қўшилган эди.