Лукас Моура фаолиятини Саудия Арабистонида давом эттириши мумкин

“Тоттенхэм” клуби ҳужумкор ярим ҳимоячиси Лукас Моура фаолиятини Саудия Арабистонида давом эттириши мумкин. Бу ҳақда италиялик журналист Николо Скира ўзининг твиттердаги саҳифасида маълум қилди.

Юқоридаги манбага кўра, 28 ёшли бразилиялик футболчига “Ал-Хилол” жиддий қизиқиб қолган. Аниқроғи, жамоа бош мураббийи Леонарду Жардим шу ёз жамоадан кетиши кутилаётган Себастьян Жовинко ўрнига айнан Моурани муносиб номзод сифатида кўрмоқда.

Моуранинг ўзи ҳали келажак фаолияти ҳақида қарор қилгани йўқ, чунки "Тоттенхэм" ҳали ҳам янги бош мураббий изламоқда. Лукаснинг агенти яқин вақт ичида лондонликларнинг бўлажак спорт директори Фабио Паратичи билан музокара ўтказишни режалаштирмоқда.

Лукас Моура ўтган мавсум АПЛда жами 30 та ўйинда иштирок этди ва ўз ҳисобига 3 та гол ҳамда 4 та голли узатма ёздириб қўйди. Унинг “шпорлар” билан амалдаги шартномаси 2024 йилга қадар имзоланган.