Madrid hokimi: “Vinisius Junior butun Ispaniyadan kechirim so‘rashi kerak”

Madrid shahri hokimi Xose Luis Martinez Vinisius Juniorni Ispaniyadagi irqchilik haqidagi fikrlari uchun uzr so‘rashga chaqirdi.

“Biz hammamiz irqchilik jamiyatda mavjudligini va uni yo‘q qilish uchun ko‘p harakat qilishimiz kerakligini bilamiz. Ammo bizni irqchi jamiyat deb atash va qo‘shimcha ravishda 2030 yilgi jahon chempionatini xavf ostiga qo‘yish Ispaniya va ayniqsa Madridga nisbatan o‘ta adolatsizlikdir.
Men undan xatosini to‘g‘irlashni so‘rayman. U kechirim so‘rashi kerak. Uning ajoyib futbolchi bo‘lgani uning xato qilmasligini anglatmaydi va bu safar xatoga yo‘l qo‘ydi.

Ispaniya jamiyatining katta qismi irqchilikka qarshi kurashda Vinisius tomonida, lekin u deyarli barcha ispan jamiyatini, ayniqsa Madridni irqchi deb atasa, biz uning tarafida bo‘la olmaymiz.

U dunyodagi eng ochiq, mehmondo‘st va rang-barang shaharlardan birida yashashini tan olishi kerak. Madridga xos bir narsa bo‘lsa, hech kimdan uning qaerdanligini, qaerga ketayotganini so‘rashmaydi. Bu erda hech kim jamoat hayotidan chetda qolmaydi.

Ba’zi baxtsiz epizodlarga chidashga majbur bo‘lgani unga deyarli butun ispan jamiyatini irqchi deb atash va JCh-2030 bu erda o‘tkazilmasligi kerak, deyish huquqini bermaydi”,- dedi hokim mahalliy nashrga bergan intervyusida.