Мадридликлар суперҳужумчига учта ўринбосар топиб қўйди

Мадриднинг “Атлетико” клуби МЛС чемпионатининг “Орландо Сити” жамоаси билан шартнома имзолаган ва ёзда АҚШга кетадиган ҳужумчи Антуан Гризманн ўрнига уч нафар номзод танлади.

Sport.es нашрининг маълум қилишича, испан клуби ПСЖ футболчиси Ли Кан Инни сотиб олиш имкониятини кўриб чиқмоқда.

Шунингдек, “Атлетико” мутасаддилари “Марсель”дан Мэйсон Гринвуд ва “Барселона”дан Ферран Торрес номзоди ҳам маъқул келган.

Клуб раҳбариятини кореялик футболчининг тор ҳудудда ҳимояни издан чиқариш қобилияти ва ҳужумчилар билан ўзаро ҳаракати жалб қилмоқда.

Гринвудда ҳужумни якунлаш, тезлик ва Испания лигасида ўйнаш тажрибаси уйғунлашган, Торрес эса бир нечта позицияда ўйнай оладиган универсал футболчи ҳисобланади.

“Орландо Сити” 24 март куни Гризманн трансферини эълон қилди. Футболчи билан шартнома 2026 йилнинг июлидан кучга киради. Ушбу келишув 2028 йилнинг охиригача мўлжалланган бўлиб, яна бир йилга узайтириш имконияти бор.