Мағлубиятсиз серия қайд этаётган боксчи автоҳалокатга учради

Биринчи ўрта вазн (69,9 кг) тоифасида мағлубиятсиз серия қайд этаётган, австралиялик боксчи Никита Цзю автоҳалокатига учради. Бу ҳақда спортчининг промоутерлари маълум қилмоқда. Ҳозирча унинг 2025 йилдаги жангларда иштирок этиши сўроқ остида қоляпти.

“Никита ҳафта охирида йўл-транспорт ҳодисасига учради. У кетаётган машинага чорраҳада бошқа автомобил урилган. Цзю енгил жароҳат олди ва ҳозирда оиласи билан бирга уйида тикланмоқда,” — деди Тим Эшворт "BoxingScene" нашрига берган интервьюсида.

Маълумот учун, Никита Цзю — 27 ёшда. У собиқ мутлақ жаҳон чемпиони Костя Цзюнинг ўғли бўлиб, профессионал рингда 2022 йилда дебют қилган. Ҳозирги кунга қадар у 11 та жанг ўтказиб, барчасида ғалаба қозонган. Шулардан 9 тасини нокаут билан якунлаган.