Мана шу 10 миллион фунтни олиб, тезроқ кет!

Англия Премьер-лигасининг энг бадавлат клубларидан ҳисобланган “Челси” мамлакатнинг энг ёрқин футболчиларидан ҳисобланган Раҳим Стерлинг билан тезроқ хайрлашишга қарор қилган.

Илгари “Ливерпуль” ва “Манчестер Сити” каби гранд клубларда порлаган ҳужумкор футболчи 2022 йилнинг ёзида “Челси”га кўчиб ўтган эди. Бироқ моҳир футболчи Лондон клубида талаб даражасида ўйнай олмади.

“Челси” ўтган мавсумни Раҳимни “Арсенал”га ижарага берганди. Микель Артета қўл остида 28 та учрашувда иштирок этган 30 ёшли ўйинчи атиги битта гол урганидан кейин “канонирлар” ёзда уни ортга қайтариб юборди.

Стерлинг ҳозир “Челси” бош мураббийи Энцо Марескага ҳам керак эмас. Аммо у ҳафтасига 300 минг фунт стерлинг маош олади ва амалдаги шартномаси 2027 йилнинг 30 июнигача давом этиши белгиланган.

Football Insider нашрининг ёзишича, “аристократлар” Стерлинг билан шартномани муддатидан олдин бекор қилмоқчи. Бунинг учун клуб ўйинчига 10 миллион фунт стерлинг миқдорида компенсация таклиф қилди.

Бу ечим Раҳимга ҳам маъқул келиши мумкин. Чунки у эркин агент мақомини олса, ўзига қизиқиш билдирган клублардан бирига бориб қўшилиш имконига эга бўлади.