“Манчестер Сити” бир ҳимоячини учта клуб билан талашяпти

Германия терма жамоаси ва “Айнтрахт” клуби ҳимоячиси Натаниэл Браун фаолиятини бошқа чемпионат – Англия Премьер-лигасининг қудратли клубларида давом эттириш имконига эга бўлди. 

TEAMtalk нашри тарқатган маълумотга кўра, “Манчестер Сити”, “Манчестер Юнайтед”, “Ньюкасл”  ва “Арсенал”  чап қанот ҳимоячисини диққат билан кузатиб боряпти. Манбанинг қайд этишича, ҳозирча немис клуби 22 ёшли футболчи учун аниқ нарх белгилаган йўқ, лекин трансферлар бўйича экспертлар Браун Англия грандларига 45-55 миллион евро атрофида тушиши мумкинлигини таъкидламоқда. 

Жорий мавсумда Браун барча турнирларда 15 та ўйинда иштирок этиб, ҳимоядаги вазифаларини бажаришдан ташқари, битта гол ва учта голли узатмага муаллифлик қилди. Ўйинчининг клуб билан амалдаги меҳнат шартномаси 2030 йил ёзигача мўлжалланган. 

Transfermarkt портали  Германия терма жамоаси сафида иккита ўйин ўтказган ёш футболчининг бозор қийматини 30 миллион еврога баҳоламоқда.