“Манчестер Сити” Ҳусанов бўйича муносабат ва муҳим маълумот чиқарди

11 июнь, 08:05
Zohir Toshxo’jayev
0
Футбол

Ўзбекистон миллий терма жамоаси 2026 йилги жаҳон чемпионатининг Осиё саралаш турнири учинчи босқичини муваффақиятли якунлаб, келаси йили АҚШ, Канада ва Мексика мезбонлик қиладиган мундиалда иштирок этиш ҳуқуқини қўлга киритди.

Ватани олдидаги вазифани муддатидан олдин ҳал қилган футболчиларимиз гуруҳдаги охирги учрашувини Тошкентда Қатарга қарши ўтказиб, 3:0 ҳисобида зафар қучди.

Терма жамоамизга ўз ўйинчиларини юборган хориж клублари ўз легионерларининг халқаро миқёсдаги ўйинларига муносабат билдирмоқда. Хусусан, Абдуқодир Ҳусановни терма жамоага жўнатган “Манчестер Сити” клуби ўзининг расмий сайтида муҳим ва қизиқарли маълумотлардан эълон қилди.

Бу маълумотлар орқали клуб мутахассислар нафақат Ҳусановнинг, балки бутун терма жамоамиз ўйинини чуқур таҳлил билан кузатиб борганини англаш мумкин.

Sports.uz портали ушбу мақолани ўзбекистонлик футбол ишқибозлари эътиборига ҳавола қилади.

- Ўзбекистон миллий терма жамоаси жаҳон чемпионати саралаш турнирини Қатар устидан 3:0 ҳисобида қозонилган ғалаба билан якунлаган баҳсда Абдуқодир Ҳусанов тўлиқ ўйнади.

Тошкентдаги баҳсда голларни Азиз Турғунбоев, Элдор Шомуродов ва Игорь Сергеев урди. 21 ёшли ҳимоячи эса, орқа чиқизда ишончли ва барқарор ўйин кўрсатди.

Ўзбекистон бутун учрашув давомида устунлик қилди: дарвозага 18 та зарба йўллади, 446 та аниқ тўп узатишни амалга оширди, рақиб эса, атиги битта аниқ зарба берди.

Ҳусановнинг ўзи 70 та аниқ пас берди ва бу борада фақатгина жамоадош Ҳусниддин Алиқулов ундан кўпроқ аниқ тўп узатди.

Бу Ўзбекистон учун гуруҳдаги ўнта учрашувда қўлга киритилган олтинчи ғалаба бўлиб, терма жамоанинг тарихда илк бор жаҳон чемпионатига чиқиши билан ўзгача аҳамият касб этди.

Ҳусанов саралаш турнирининг охирги саккизта учрашувида бир дақиқани ҳам ўтказиб юбормади, терма жамоа бу ўйинларда атиги бешта тўп ўтказди холос.

Марказий ҳимоячи фаолияти давомида терма жамоа учун жами 22 та учрашувда иштирок этди, энди у футбол оламининг энг муҳим воқеаси – келаси ёзда АҚШ, Канада ва Мексика мезбонлик қиладиган жаҳон чемпионатида ўзини кўрсатиш имконига эга бўлади.

Шу тариқа, Ўзбекистон 2026 йилги мундиалда қатнашиш учун ҳозирдан жойини кафолатлаган дунёдаги ўнта терма жамоадан бирига айланди.

Энди Абдуқодир Ҳусанов “Манчестер Сити” клубининг Академиясига қайтиб, ФИФАнинг янги форматдаги нуфузли турнири – клублар ўртасидаги жаҳон чемпионатига тайёргарликни бошлаб юборади, - деб ёзмоқда клуб матбуот хизмати вакили Жек Манфорд.

Эслатиб ўтамиз, клублар ўртасидаги жаҳон чемпионати 15 июнь куни бошланади. АҚШ мезбонлик қилаётган мусобақада 32 та жамоа гуруҳларга бўлинган ҳолда бош соврин учун курашни бошлайди. Ҳар бир гуруҳдан иккитадан энг кучли жамоа плей-оффга чиқиб, юришини давом эттиради.

“Манчестер Сити” футболчилари жаҳон чемпионатининг гуруҳ босқичида Италиянинг “Ювентус”, Бирлашган Араб Амирликларининг “Ал-Айн” ва Марокашнинг “Видан” жамоалари билан рақобатлашиши белгиланган.