"Манчестер Сити" Ҳусанов ўйнаётган позицияга "Барселона" юлдузини олиб келмоқчи бўлган

Англиянинг "Манчестер Сити" клуби "Барселона" ҳимоячиси Жюль Кундени сотиб олиш имкониятига қизиқиш билдиргани маълум бўлди. Бу ҳақда каталонияликлар спорт директори Деку айтиб ўтди.

- "Манчестер Сити" биздан Жюль Кунде сотиладими, деб сўради, лекин биз йўқ, деб жавоб бердик. Расмий таклиф ҳам, ҳеч қандай музокаралар ҳам бўлмаган, - дея функционернинг сўзларини келтирди Mundo Deportivo.

2022 йилда "Барса" Кундени "Севилья"дан 50 миллион еврога сотиб олди. Жорий мавсумда француз барча турнирларни ҳисобга олган ҳолда саккизта ўйинда майдонга тушиб, битта гол урди ва битта голли узатмани амалга оширди.

26 ёшли Кунденинг "Барселона" билан шартномаси 2030 йилгача мўлжалланган. Transfermarkt мутахассислари футболчининг нархини 65 миллион еврога баҳоламоқда.

Ҳозирда, "шаҳарликлар"нинг ўнг қанот ҳимоясида кўпинча легионеримиз Абдуқодир Ҳусанов тўп сурмоқда. Терма жамоамиз аъзоси тўлиқ 90 дақиқа майдонда ҳаракат қилган ўйинларда "Сити" мағлуб бўлмади ва гол ўтказиб юбормади.