"Манчестер Сити" мундиал кашфиёти билан келишувга эришди

«Манчестер Сити» «Лилль» ярим ҳимоячиси Айюб Буадди билан шартнома имзолаш арафасида турибди. Италия нашрларининг ёзишича, англиялик клуб 19 ёшли марокашлик футболчи билан 2031 йилгача мўлжалланган шартнома борасида принципиал келишувга эришган.

Эндиликда энг асосий масала – трансфер учун тўланадиган миқдор бўйича клублар ўртасидаги музокаралар. «Лилль» президенти Оливье Летаннинг таъкидлашича, у Буадди учун 135 миллион евродан кўпроқ маблағ олишни кутмоқда.

«Агар Андерсоннинг «Манчестер Сити»га тахминан 157 миллион еврога ўтаётганини, Тоналининг эса «Тоттенхэм»га 135 миллион атрофидаги суммага трансфер қилинганини кўрсам, уларнинг ривожланиш салоҳияти Айюбникидек эмаслигини инобатга олган ҳолда, ўз футболчим учун ўз баҳом пайдо бўлади», – дея Летаннинг сўзларини келтиради Onefootball.

Ўтган мавсумда Буадди 42 та ўйинда майдонга тушиб, бир бор голли узатма муаллифи бўлди.