"Манчестер Сити" мухлислари: "Ҳусановсиз Гвардиола чемпионликка эриша олмайди!"

"Манчестер Сити" мухлислари "Фулхэм"га қарши учрашувда португалиялик Матеус Нунеснинг ўйинидан қаттиқ норози бўлишди ва унинг ўрнига ўзбекистонлик ҳимоячи Абдуқодир Ҳусановни асосий таркибга қайта киритишни талаб қилишди.

Англия Премьер-лигасининг 14-турида "Манчестер Сити" сафарда "Фулхэм"ни 5:4 ҳисобида мағлуб этди. Бир голлик фарқ билан қўлга киритилган ғалабадан кейин "Сити" мухлислари Нунеснинг ўйинидан рози бўлишмади. Унинг хатолари ва кераксиз йўқотишлари икки ўйиндан бери жамоага жиддий муаммо туғдираётгани таъкидланди.

Айрим мухлислар ижтимоий тармоқларда бош мураббий Пеп Гвардиолага мурожаат қилиб, Нунесни захирага ўтказиш ва Ҳусановни асосий таркибга қайтаришни сўрашди:

"Матеус Нунес асосий ўнг ҳимоячи бўлса, сиз чемпионликни қўлга кирита олмайсиз", — деб ёзди мухлислардан бири.

Яна бир ишқибоз шундай мурожаат қилди:

"Пеп, илтимос, Ҳусановни асосий таркибга қайтаришинг учун яна нима бўлиши керак? Мен Нунесдан чарчадим. Рақиблар уни осонгина алдаб ўтишмоқда".

Учрашувдан сўнг яна бир норози мухлис қуйидагича фикр билдирди:

"Матеус Нунес иккинчи таймда ҳақиқий қийноққа дуч келди. "Сити"га шошилинч равишда Ҳусанов керак. Нунес жуда ёмон ўйнади".

Маълумот ўрнида, 14 турдан сўнг "Манчестер Сити" 28 очко билан турнир жадвалида иккинчи ўринни эгаллаб турибди. Жамоа етакчи "Арсенал"дан 5 очко орқада.

Эслатиб ўтамиз, Ўзбекистон миллий терма жамоамиз ҳимоячиси ҳисобланган Абдуқодир Ҳусанов "шаҳарликлар" таркибида сўнгги бор "Байер"га қарши Чемпионлар лигаси доирасидаги тўқнашувда иштирок этган эди.