“Манчестер Сити” профессионал футболдан бутунлай четлатилиши мумкин

“Манчестер Сити” Англия Премьер-лигасининг молиявий қоидаларини бузиш билан боғлиқ иш доирасида ўта жиддий оқибатларга дуч келиши мумкин. Бу ҳақда журналист Бен Жейкобс ўзининг YouTube-каналида маълум қилди.

- Агар “Манчестер Сити” Премьер-лигадан четлатилса, EFL иш бўйича чиқарилган қарорни ўрганади ва Премьер-лиганинг позициясини қўллаб-қувватлаган ҳолда, “Манчестер Сити”нинг ўз мусобақаларида ҳам иштирок этишига йўл қўймасликка ҳаракат қилади.

Энг ёмон сценарийда “Манчестер Сити” умуман профессионал футболдан четлатилиши хавфи мавжуд. Бироқ бу юридик жиҳатдан мумкин бўлган вариантлардан фақат бири. Шунинг учун клубга айнан қандай жазо қўлланишини ҳозирдан тахмин қилиш тўғри эмас, - деди Жейкобс.

EFL таркибига Премьер-лигадан кейинги Англия профессионал футболининг иккинчи, учинчи ва тўртинчи поғоналари – Чемпионшип, Лига 1 ва Лига 2 киради.

“Манчестер Сити” 2009–2018 йиллар оралиғида Англия Премьер-лигасининг молиявий қоидаларини бузганликда айбланмоқда. Премьер-лига клубга жами 115 та айблов қўйган. Улар, жумладан, молиявий маълумотларни тақдим этиш, футболчилар ва мураббийларга тўловлар, УЕФАнинг молиявий фэйр-плей қоидалари ҳамда даромад ва барқарорлик талабларига риоя қилиш билан боғлиқ.